Përdoruesit e Nothing Phone 2 do të mund të komunikojnë me përdoruesit e iPhone me “flluska blu”. Kompania tregoi se ka bërë të mundur që të përdorni iMessage në telefonin e saj më të ri përmes një aplikacioni të ri “Nothing Chats” i fuqizuar nga platforma e mesazheve Sunbird.
Funksioni do të jetë i disponueshëm për përdoruesit në Amerikën e Veriut, BE dhe vende të tjera evropiane duke filluar nga kjo e premte, 17 nëntor. Nothing shkruan në faqen e saj se po e bën këtë sepse “shërbimet e mesazheve po ndajnë përdoruesit e telefonit” dhe ajo dëshiron “t’i thyejë këto barriera“. Por për ta bërë këtë duhet që t’i besoni Sunbird-it. FAQ e Nothing thotë se “arkitektura e Sunbird-it ofron një sistem për të dërguar një mesazh nga një përdorues te tjetri pa e ruajtur atë në asnjë moment të dërgimit të tij” dhe se mesazhet nuk ruhen në serverët e tij.
Marques Brownlee kishte mundësinë të testonte Nothing Chats. Ai konfirmoi me Nothing se shërbimi iMessage në Android bëhet i mundur përmes regjistrimit të adresës në një server me Mac Mini i cili do të funksionojë si urë lidhëse për të shfaqur mesazhet që dërgoni me flluska blu.
Por ju sërish do t’i jepni Sunbird akses në llogarinë tuaj iCloud për ta bërë këtë të funksionojë dhe siç kemi mësuar të gjithë gjatë viteve, kompanitë nuk bëjnë gjithmonë atë që thonë se bëjnë. Pra me pak fjalë siguria juaj mund të kompromentohet.
Po ju a do të blinit një Nothing Phone 2 vetëm për të komunikuar me përdoruesit e iPhone përmes iMessage?
