Kur filluan të dalin pamjet e para të iPhone 11 një pjesë e madhe e fansave të Apple u shprehën jo fort entuziastë. Krejt e kundërta një gungë e tillë masive ishte përqeshur prej kohësh kur shihej tek Androidët e parë që prezantoheshin me atë formë.
Por shtimi i një lenteje tjetër, kërkonte padyshim një ri-design. Na pëlqeu apo jo gunga me 3 kamera është tashmë një realitet, dhe pozicionimi i këtyre të trejave është shenjë dalluese e iPhone të fundit.
Por nëse ky pozicionim nuk të pëlqen, mos u qaj se mund të kishte shkuar më keq.
Patenta e regjistruar përpara se të prezantohej smartphone, ka dalë së fundmi në qarkullim, dhe duket se Apple paska pasur më shumë se një ide për rendin e lenteve.
Dy lente lart dhe një tjetër poshtë duket më e pranueshmja nga të tjerat. Tek e fundit nuk është aq e ndryshme nga versioni përfundimtar. Megjithatë kjo alternativë nuk ia doli të fitojë.
Gunga katrore elegante duket se nuk paska qenë e vetmja alternativë gjithashtu. Në këtë foto duket qartë forma rrethore e saj e cila do të anonte më shumë nga një smartphone Huawei sesa një Apple. Ndaj këtë herë jemi të kënaqur që nuk ishte kjo zgjedhja përfundimtare.
Dhe së fundmi një formë krejt e çuditshme, me kënde të tepërta qenka konsideruar gjithashtu. Plotësisht jo-Apple si design, duke marrë parasysh kurimin që kompania i bën detajeve dhe simetrisë së produkteve të veta. Në foto ama duket vetëm 11 me dy lente, mbetet e paqartë nëse kjo formë do të aplikohej edhe tek 11 Pro dhe Max me 3 të tilla. Sidoqoftë le të jemi të kënaqur që nuk e pamë në versionin final.
Mbetet për tu parë ç’do të ndodhë me iPhone 12, zërat dhe pamjet e para flasin për respektimin e të njëjtës filozofi, por kurrë nuk i dihet. Kujtojmë edhe faktin se të paktën njëri nga 4 versionet që pritet të lançohen në shtator do të ketë 4 lente prapa, pasi sensori LIDAR për thellësinë, është tashmë i konfirmuar.
