Motorola ka prezantuar zyrtarisht 2 smartphone të rinj të palosshëm, duke konfirmuar kështu shumë nga raportimet e mëparshme.
Njësoj siç parashikohej, modeli standard Razr 2023 ofron një ekran të jashtëm modest, ndërkohë që modeli Razr Plus vjen me një ekran të jashtëm masiv nga ku ju mund të kryeni shumicën e veprimeve pa patur nevojën për të hapur smartphone-in.
Gjithashtu Motorola premtoi se këto smartphone do të pajisen me 3 update për OS dhe update sigurie për 4 vitet e ardhshme.
Megjithatë, le të diskutojmë më në detaje për këto smartphone.
2023 Motorola Razr
Modeli standard 2023 Motorola Razr (ose Razr 40 siç do të njihet në tregun ndërkombëtar) vjen me të njejtën madhësi dhe formë si modeli Razr Plus, por dallimi kryesor qëndron në ekranin e jashtëm. Këtu ky ekran është vetëm 1.5” OLED i cili është dizenjuar për të lexuar informacione të shpejta rreth motit, njoftimeve apo eventeve të ndryshme në kalendarin tuaj.
Proçesori që do të fuqizojë këtë pajisje është Snapdragon 7 Gen 1, që do të shoqërohet dhe me një bateri me kapacitet 4,200mAh. Ekrani i brendshëm do të ketë madhësinë 6.9” dhe refresh rate 144Hz duke e bërë navigimin shumë të shpejtë.
Për sa i përket kamerave, në Motorola Razr 40 do të gjendet kamera kryesore 64MP, ajo ultrawide 13MP si dhe kamera selfie 32MP.
2023 Motorola Razr Plus (Motorola Razr 40 Ultra)
Le të sqarojmë që në fillim që emërtimi Plus është bërë për të përshkruar ekranin e madh 3.6” OLED që gjendet në pjesën e jashtme të smartphone-it të palosshëm. Falë këtij përmirësimi ju mund të bëni shumë më tepër veprime në këtë ekran. Sigurisht do të mund të përdorni aplikacionet e optimizuara të parashikimit të motit, kalendarit, makinës llogaritëse, por mund të hapni dhe programe të tjera jo të optimizuara si Chrome, Gmail apo Instagram.
Rritja e madhësisë së ekranit të jashtëm i jep gjithashtu një avantazh këtij smartphone-i kundrejt rivalit direkt Samsung Galaxy Z Flip 4, megjithatë do të duhet të presim dhe përgjigjen e Samsung gjatë kësaj vere.
Do të jetë proçesori Snapdragon 8 Gen 1 ai që do të fuqizojë këtë smartphone, i shoqëruar nga 8GB RAM dhe 256GB internal storage. Në pjesën e brendshme gjendet ekrani 6.9” 1080p LTPO me refresh rate 165Hz për një navigim sa më të shpejtë. Për fat të keq karikimi wireless është i mundur vetëm në 5W në modelin Plus.
Ndryshe nga modeli bazë, Razr Plus do të ketë një kamera kryesore 12MP si dhe atë ultrawide 13MP. Ky smartphone do të prezantohet në tregun amerikan me një çmim prej $999 në ngjyrat Black, Magenta dhe Blue.
