Që të gjithë e kemi shumë bezdi momentin kur jemi gati për të dalë nga shtëpia dhe vëmë re që telefoni ynë nuk ka bateri. Por ky shqetësim mund të jetë së shpejti një gjë e së kaluarës pasi prodhuesi i telefonave inteligjentë Realme sapo ka prezantuar një karikues që mund të karikojë telefonin tuaj në më pak se pesë minuta.
Teknologjia e re SuperSonic Charge e prodhuesit kinez mund të karikojë një telefon me fuqi deri në 320 W – kjo është 16 herë më shumë se një karikues standard i iPhone. Për krahasim, iPhone 15 dhe 15 Plus mund të karikojnë në mënyrë të besueshme vetëm në një maksimum prej 20 W, gjë që siguron një karikim prej 50% në rreth gjysmë ore.
Në një event këtë javë, kompania demonstroi se si mund të karikonte një bateri 4,420 mAh në katër minuta e 30 sekonda. Fatkeqësisht, Realme ende nuk ka prezantuar një smartphone që mund të përballojë kaq shumë energji, kështu që mund të duhet pak kohë përpara se të mund ta karikoni plotësisht telefonin tuaj ndërsa përgatisni kafen e mëngjesit në ekspres.
Kjo arritje mbresëlënëse është e mundur për shkak të përmirësimeve të rëndësishme si në karikues ashtu edhe në vetë baterinë. Në fillim të vitit të kaluar, Realme vendosi rekordin për karikimin më të shpejtë të telefonit inteligjent me GT Neo 5, i cili mund të karikonte në nëntë minuta e gjysmë falë një karikuesi 240 W. Përshtatësi më i fundit i rrymës ‘Pocket Cannon’ i kompanisë mund të sigurojë një maksimum prej 320 Ë fuqi për një pajisje që mund ta përballojë këtë energji.
Karikuesi përmban dy porta USB-C të cilat mund të përdoren gjithashtu për të karikuar me 150W telefonat inteligjentë të Realme dhe 65W pajisje si laptopët.
