Counterpoint Research ka publikuar listën e telefonave më të shitur globalisht për tremujorin e parë të vitit 2025, duke treguar dominimin e Apple dhe një rënie të dukshme për Samsung. Seria iPhone 16 zë tre vendet e para, me modelin bazë iPhone 16 në krye, ndjekur nga iPhone 16 Pro Max dhe iPhone 16 Pro. Kjo përbën një ndryshim krahasuar me vitin e kaluar, kur iPhone 15 Pro Max ishte më i shituri.
Në total, Apple ka 5 modele në top 10, përfshirë iPhone 15 në vendin e katërt dhe iPhone 16 Plus në të dhjetin.
Sa i përket Android-it, Samsung vazhdon të qëndrojë në treg, por me shenja të rënies. Telefoni më i shitur Android deri tani në 2025 është Galaxy A16, një model ekonomik me çmim $199, ndjekur nga Galaxy A06 dhe Galaxy S25 Ultra. Ndryshe nga 2024, ku Galaxy S24 Ultra ishte modeli më popullor Android dhe S24 gjithashtu ishte në listë, këtë vit Galaxy S25 Ultra renditet më poshtë dhe asnjë tjetër nga seria S25 nuk është në top 10.
Redmi është marka e vetme përveç Apple dhe Samsung që figuron në listë, me Redmi 14C 4G në vendin e tetë — duke ia zënë vendin Samsung-it në top 10.
Counterpoint vëren gjithashtu një trend në rritje drejt telefonave ekonomikë, veçanërisht atyre nën 100 dollarë, të cilët kanë fituar më shumë terren këtë vit. Megjithatë një faktor ndikues në shitjet e Samsung mund të jetë periudha më e shkurtër e shitjeve për Galaxy S25 në fillim të vitit.
