Informacione të reja janë publikuar në rrjetin social X nga përdoruesi Majin Bu rreth serisë më të re të iPhone-ve që pritet të prezantohet në shtator të këtij viti. Megjithëse parashikimet e këtij leaker-i të njohur nuk kanë qenë gjithmonë të sakta, ai shpesh herë na ka treguar një version të hershëm të dizajnit final të iPhone-ve të ardhshëm dhe postimi i tij i fundit mund të na tregojë për një ndryshim në dizajnin e kamerave të pasme në iPhone 16.
Në postimin e tij, Bu ndau një imazh të asaj që duket të jetë ishulli i kamerave për modelin bazë iPhone 16, duke shfaqur një vendosje vertikale të dy kamerave. Edhe pse imazhi i këtij komponenti u postua me kokë poshtë, siç theksohet nga përdoruesit që iu përgjigjën postimit të Bu, kjo nuk ndikon në origjinalitetin e vetë komponentit.
Nëpërmjet burimeve të MacRumors, është konfirmuar se komponenti i paraqitur në postimin e Bu është pjesë e projektit të kamerës I-34, i destinuar për t’u përdorur në modelin bazë iPhone 16 që do të dalë më vonë këtë vit. Ky leak i komponentëve përputhet me raporte të shumta në lidhje me paraqitjen e re vertikale të kamerës që Apple ka planifikuar për iPhone 16.
Duke përdorur këtë vendosje vertikale të kamerës, Apple mund të bëjë të mundur Spatial Video recording në modelin bazë të iPhone 16, duke zgjeruar disponueshmërinë e përgjithshme të shërbimit në të gjithë pajisjet e serisë iPhone 16.
