Raportime të shumta në internet po flasin për një iPhone SE të ri që mund të vijë në treg në muajt e parë të vitit 2025, së bashku me një version të ri të iPad Air.
Për shkak se linja e iPhone SE nuk ka parë një përditësim që nga viti 2022, ka shumë përmirësime të mundshme që mund të shfaqen në modelin e ri. Ne kemi dëgjuar tashmë për një dizajn të ri pa “Home Button”, i cili mund të jetë i ngjashëm me ekranin që gjendet në iPhone 14. Ky do të jetë një përditësim shumë i mirëpritur, pasi një dizajn i tillë është shumë i vjetër. Me sa duket, iPhone SE 4 do të përdorë Face ID për zhbllokimin e telefonit, si pjesa tjetër e linjës së iPhone.
Në raportin e tij, Gurman sugjeron që Apple Intelligence mund të vijë në iPhone SE të ardhshëm, gjë që do të kërkonte një çip të përmirësuar të sistemit. Raportimet rreth iPhone SE tregojnë se në këtë model do të përdoret procesori i ri A18. Për fat të keq të gjitha këto përmirësime të rëndësishme mund të shoqërohen me një rritje të çmimit për iPhone SE 4, i cili mendohet të jetë më tepër se $429 që kushton modeli aktual.
Gjithashtu Gurman pohon se Apple është duke punuar në versionet e reja 11 dhe 13 inç të iPad Air që do të vijnë në të njëjtën kohë me iPhone SE 4. Tabletët e rinj thuhet se do të kenë “përmirësime të brendshme“. Nuk është e qartë se çfarë mund të sjellin këto përmirësime. Dhe Apple sapo lëshoi një iPad Air të fuqizuar nga M2 këtë vit së bashku me një version 13 inç të atij tableti. Gjithashtu e zhvendosi kamerën në skajin e gjerë.
Përtej çipit të ri dhe madhësisë më të madhe, iPad Air i fundit nuk është aq i ndryshëm nga iPad Air 2022 me procesor M1. Me sa duket, Apple është duke punuar në Magic Keyboards të reja që synojnë të përshtaten me versionet 11 dhe 13 inç të iPad Air. Gurman gjithashtu thekson se një iPad Mini i ri do të dalë para fundit të vitit 2024.
Ndërkohë, Apple pritet të prezantojë një numër produktesh të reja këtë muaj duke përfshirë MacBook Pro të rinj me M4, Mac Mini, iMac dhe Apple TV 4K.
