Deri më tani kemi patur raportime të shumta në lidhje me shërbimet më të reja që do të vijnë në serinë e re të iPhone-ve, dhe kësaj here bëhet fjalë për karikimin e këtyre pajisjeve.
ChargerLab, një website mjaft i besueshëm që flet për pjesën e karikimit të smartphone-ve, ka raportuar se të gjithë modelet iPhone 15 do të mbështesin karikimin e shpejtë 15W wireless me standardin e hapur Qi2. Nëse raportimi është i vërtetë, atëherë mund të jetë një hap pas për Apple, pasi kompania më parë lejonte karikimin 15W vetëm nëpërmjet MagSafe, ndërkohë që karikuesit e tjerë të paçertifikuar karikonin në shpejtësinë 7.5W.
Apple po futet në një territor komplet të ri në pjesën e karikimit, pasi jo vetëm që do të lejojë karikimin e shpejtë wireless, por do të përdorë portën USB-C për karikimin me kabllo, duke i dhënë mundësinë përdoruesve që të përdorin kabllo të tjera jo të prodhuara nga Apple.
Për më tepër, Apple duket se po tregohet “shumë zemërgjërë” dhe është e gatshme që të punojë me standardet e hapura për iPhone-t e ardhshëm. Është e vërtetë që ligjet e Bashkimit Evropian po e detyrojnë kompaninë në këto veprime, mirëpo ato hyjnë në fuqi në vitin 2024, kështu që Apple kishte mundësinë që ta shtynte me 1 vit adobtimin e USB-C në pajisjet e tyre.
