Huawei ka prezantuar gjeneratën e dytë të smartphone-it të saj trifold, duke synuar të forcojë rikthimin në tregun kinez dhe të rifillojë praninë ndërkombëtare. Pajisja e re quhet Huawei Mate XTs dhe kushton nga 2,520 $ deri në $3,000, në varësi të memories.
Ndryshe nga telefonat e palosshëm klasikë që kanë një menteshë, Mate XTs ka dy mentesha, duke u palosur në dy pika dhe shndërruar në një pajisje të ngjashme me tablet kur hapet. Ky është evoluimi i Mate XT, i cili vitin e kaluar ishte telefoni i parë me 3 pjesë të palosshme në botë. Vetëm deri në tremujorin e dytë 2025, Huawei ka shitur 470,000 njësi Mate XT, duke gjeneruar mbi 1.3 miliardë dollarë të ardhura.
Kjo risi ka ndihmuar kompaninë të rrisë ndjeshëm praninë e saj në tregun vendas. Sipas Counterpoint Research, pjesa e tregut të Huawei në Kinë u rrit në 18% në tremujorin e dytë, duke e bërë markën numrin një në shitje. Në segmentin e telefonave foldable, Huawei zotëron 75% të tregut, sipas IDC. Kjo tregon se edhe pse pajisjet janë të shtrenjta, ekziston një kërkesë e madhe për inovacion.
Mate XTs funksionon me sistemin operativ HarmonyOS 5.1, të optimizuar për produktivitet. Telefoni ofrohet në 4 ngjyra dhe vjen me një bateri të fuqishme 5,600 mAh, më e madhe se shumica e modeleve aktuale.
Për të tërhequr blerës, Huawei ofron 50% zbritje për zëvendësimin e ekranit dhe dy shërbime falas teknike. Megjithëse jashtë Kinës kompania ka ende vështirësi për shkak të sanksioneve dhe kufizimeve teknologjike, Mate XTs është një provë se Huawei vazhdon të inovojë dhe të sfidojë rivalët.
