Seria e re e iPhone-ve me shumë mundësi do të prezantohet në shtator si çdo vit, megjithatë raportime të ndryshme qarkullojnë në internet rreth përmirësimeve të reja që pritet të vijnë në këtë pajisje.
Nga përmasat më të mëdha të ekranit dhe kornizat më të holla e deri tek procesorët e rinj, gama e iPhone 16 duket se do të shfaqë një shumëllojshmëri përmirësimesh. Apple ka folur tashmë për aftësitë e saj Apple Intelligence që do të vijnë në iOS 18 dhe ne presim të dëgjojmë më shumë se si këto veçori të AI do të përdoren në fillim të lançimit të telefonit. Megjithatë, pritet gjithashtu një përmirësim dhe për sa i përket kamerave.
Sipas analistit të Apple, Ming Chi Kuo, iPhone 16 Pro do të pajiset me një lente zmadhimi optik 5x. Kjo ishte diçka që gjendej vetëm në iPhone 15 Pro Max më të madh, kështu që do të ishte mirë të shihje të njëjtin nivel zmadhimi të ofruar në një formë më të vogël.
Por është e mundur që të dy telefonat të kenë një përmirësim, me disa informacione të mëparshme që sugjerojnë se iPhone 16 Pro Max do të marrë një lente “super telefoto” që ofron nivele zmadhimi përtej intervalit aktual 5x. Ndonëse kjo do të ishte një shtesë e mirëseardhur për fotografët e sporteve ose kafshëve të egra që mbështeten në nivelet e mëdha të zmadhimit, këto thashetheme qarkulluan dhe në verën e vitit të kaluar para se të shihnim lançimin e iPhone 15.
MacRumors sugjeron nga ana tjetër se një buton i ri do të jetë prezent në iPhone 16 që do të përdoret specifikisht nga fotografët për shkrepjen e fotografive apo fokusimit. Është e mundur që ky shërbim të njohë dhe gjestet rrëshqitëse majtas apo djathtas për sa i përket zmadhimit.
Për të rritur cilësinë e imazheve dhe në ambiente me pak ndriçim, sensori i kameras kryesore të iPhone 16 Pro pritet të ketë një madhësi 1/1.14 inç, pak më i madh se ai 1/1.28 që gjendet në iPhone 15 Pro.
Për sa i përket kamerave ultrawide, pritet që të kemi një përmirësim të sensorëve, të cilët do të kenë tashmë rezolucion 48MP, si dhe do të vendosen në një orientim horizontal në iPhone 16 dhe 16 Plus për të bërë të mundur regjistrimin e Spatial Videos që shikohen në Vision Pro.
