Deri më tani ju mund të keni provuar disa aplikacione të ndryshme AI në smartphone-in tuaj, si përshembull ChatGPT, HeyPi, apo Runway ML që ju lejon të gjeneroni video përmes inteligjencës artificiale.
Megjithatë, deri më tani shumica e shërbimeve AI mbështetet në shërbimin e bazuar në cloud, pra i gjithë proçesimi magjik ndodh në cloud. Por kjo gjë mund të ndryshojë së shpejti për disa smartphone Android falë MediaTek.
Prodhuesi i proçesorëve dëshiron që t’i ofrojë përdoruesve aftësinë e proçesimit të komandave të ndryshme të inteligjencës artificiale direkt nga smartphone-i, pa patur nevojë për një cloud që të bëjë të gjithë punën. MediaTek ka planifikuar që një shërbim të tillë ta ofrojë në serinë e re të proçesorëve flagship që po prodhon, të cilët do të përdoren nga smartphone të ndryshëm Android në fund të këtij viti.
Kjo kompania po merr gjithashtu një ndihmë të madhe nga Meta, e cila ofron modelin Llama 2 si një sistem themelor për gjenerimin e aplikacioneve AI.
Dhe Qualcomm duket se ka një ide të tillë për të ardhmen e proçesorëve flagship që prodhon, pasi ka arritur një marrëveshje me Meta për përdorimin e Llama-2 në smartphone-t e fuqizuar nga proçesorët që prodhon duke nisur nga viti 2024.
