Pas lëvizjes së Francës për të ndaluar shitjen e iPhone 12 në tregun e saj, vende të tjera të Bashkimit Evropian (BE) si Belgjika, Gjermania dhe Holanda po shqyrtojnë nivelet e rrezatimit të kësaj pajisje. Ndërsa asnjë nga tre vendet nuk ka shpallur ende ndalimin e shitjeve, mundësia nuk mund të përjashtohet.
Rregullatorët francezë urdhëruan ndalimin e shitjes së pajisjes, duke pretenduar se emëton nivele të rrezatimit elektromagnetik që tejkalojnë standardet e BE-së. Agjencia Kombëtare e Frekuencave, agjencia e ngarkuar me mbikëqyrjen e frekuencave të komunikimit ëireless në vend, dha direktivën pasi iPhone 12 dështoi në një nga dy llojet e testeve.
Agjencia kreu teste në 141 telefona dhe zbuloi se niveli i rrezatimit të energjisë elektromagnetike të iPhone 12 kur mbahet në dorë është 5.74 W/kg. Kjo shifër është mbi standardin e BE-së prej 4 W/kg.
Vlen të përmendet se iPhone 12 kaloi me sukses një test tjetër të bërë për të përcaktuar nivelet e rrezatimit në një pajisje kur vendoset në një xhaketë ose çantë. Pas rezultateve të testit, rregullatori francez i bëri thirrje Apple të përdorë çdo mjet të mundshëm për të trajtuar shpejt këtë çështje për pajisjet tashmë në qarkullim.
Agjencia premtoi të monitorojë situatën përmes përditësimeve të pajisjes. Nëse nivelet e rrezatimit janë ende të larta, atëherë kompania do të detyrohet të lëshojë urdhër tërheqje për pajisjet e shitura tashmë. Ndërkohë, Apple ka mohuar akuzat se iPhone 12 është i pasigurt, duke deklaruar se shumë rregullatorë ndërkombëtarë e kanë certifikuar atë si të sigurt për t’u përdorur.
Kujtojmë se iPhone 12 u lançua në vitin 2020. Kompania shtoi se pajisja plotëson kërkesat për rrezatimin në shumë tregje. Apple deklaroi më tej se kishte kryer shumë testime laboratorike për të konfirmuar nivelin e sigurisë së pajisjes tek rregullatori francez.
