Që nga viti 2022, Apple ka ofruar lidhje satelitore në iPhone, kryesisht për komunikime emergjente. Megjithatë, një raportim nga The Information zbulon se Apple kishte plane shumë më ambicioze. Që në vitin 2015, Apple nisi bashkëpunim me Boeing në projektin “Project Eagle” për të lançuar mijëra satelitë që do ofronin internet të plotë wireless drejtpërdrejt në iPhone dhe shtëpi. Për përdoruesit në shtëpi, Apple planifikonte antena që ngjiten në dritare për të shpërndarë sinjalin në ndërtesë.
Megjithatë, Apple u tërhoq. CEO Tim Cook u shqetësua se ky hap mund të prishte marrëdhëniet me kompanitë celulare. Gjithashtu, frika nga përfshirja e qeverisë amerikane dhe një përplasje me Elon Musk ndikuan që Apple të minimizonte ambiciet.
Në vitin 2022, Musk i ofroi Apple një marrëveshje ekskluzive me SpaceX për lidhje satelitore, duke kërkuar $5 miliardë menjëherë dhe $1 miliardë në vit pas 18 muajsh. Ai kërcënoi se nëse Apple nuk pranonte, do prezantonte vetë një shërbim të ngjashëm që funksiononte në pajisjet e kompanisë. Apple e refuzoi ofertën, dhe Musk u bashkua me T-Mobile për të ofruar komunikim përmes mesazheve në zona pa sinjal përmes Starlink.
Apple shqetësohet se zgjerimi i shërbimit mund të sjellë një rregullim nga qeveria, përfshirë kërkesa për survejim që cenojnë privatësinë. Brenda kompanisë ka gjithashtu mendime të ndryshme. Disa, si Craig Federighi, mendojnë se Apple duhet ta braktisë këtë shërbim dhe t’ia lërë kompanive celulare. Megjithatë, thuhet se Apple Watch Ultra 3 mund të ketë mbështetje satelitore këtë vit.
Apple mbetet e kujdesshme dhe e rezervuar në këtë fushë, për shkak të strategjisë së saj të kontrollit, sfidave me Musk dhe frikës nga rregulloret.
