Apple është duke finalizuar një marrëveshje me OpenAI për të përdorur teknologjinë e startup-it në iPhone, pjesë e një shtytjeje më të gjerë për të sjellë veçori të inteligjencës artificiale në pajisjet e saj, sipas njerëzve të njohur me këtë çështje. Të dy palët kanë rënë dakord për kushtet për një pakt për të përdorur veçoritë ChatGPT në iOS 18 të Apple, versionin e ardhshëm të sistemit operativ të iPhone, bëjnë të ditur burime anonime.
Apple gjithashtu ka zhvilluar bisedime me Google të Alphabet Inc. për licencimin e chatbot-it Gemini të asaj kompanie. Këto diskutime nuk kanë çuar në një marrëveshje, por janë në vazhdim e sipër. Një marrëveshje me OpenAI do t’i lejonte Apple të përdorë chatbot-in e mirënjohur ChatGPT si pjesë e një sërë veçorish të reja të AI që po planifikon të prezantojë muajin e ardhshëm. Bloomberg raportoi në prill se diskutimet me OpenAI ishin intensifikuar. Megjithatë, nuk ka asnjë garanci që një marrëveshje do të shpallet menjëherë.
Apple planifikon të bëjë një bujë në botën e inteligjencës artificiale në qershor, kur do të organizojë eventin e përvitshëm Worldwide Developers Conference. Vitin e kaluar, shefi ekzekutiv i Apple, Tim Cook tha se ai personalisht përdor ChatGPT të OpenAI, por shtoi se kishte “një numër problematikash që duhen zgjidhur“.
Ai premtoi se shërbimet e reja të AI do të vijnë në produktet e kompanisë në një “paketë shumë të menduar“. Në konferencën e të ardhurave të Apple javën e kaluar, ai argumentoi se kompania do të kishte një avantazh në AI. “Ne besojmë në fuqinë transformuese dhe premtimin e AI dhe besojmë se kemi avantazhe që do të na dallojnë në këtë epokë të re, duke përfshirë kombinimin unik të Apple të integrimit të pandërprerë të harduerit, softuerit dhe shërbimeve,” tha Cook gjatë mbledhjes së fitimeve.
