Seria e smartphone-ve P50 të Huawei është prezantuar që në gusht të 2021, megjithatë duket se kompania nuk është dorëzuar ende dhe do të vazhdojë të sjellë smartphone të rinj në këtë seri. Sipas raportimeve të fundit bëhet e ditur se Huawei P60 dhe P60 Pro do të lançohen në mars të këtij viti me kamera të përmirësuara, ekrane të reja dhe bateri më të mëdha.
Huawei P60 Pro pritet të ketë një ekran OLED 6.6” me refresh rate 120Hz. Rezolucioni i këtij ekrani do të jetë më i madh se në gjeneratën e kaluar, 1,440 x 3,299px në vend të 1,228 x 2,700px në P50 Pro. Gjithashtu do të jetë e pranishme një kamera selfie hole punch me rezolucion 32MP.
Në pjesën e pasme do të jenë të pranishme kamera kryesore 50MP (sensor Sony IMX888), ndërkohë që kamera ultrawide do të përdorë një sensor të ri 50MP. Për sa i përket sensorit në telephoto, pritet të jetë i njejti 64MP i përdorur dhe në gjeneratën e mëparshme.
Versioni bazë Huawei P60 do të përdorë sensorë të tjerë në kamerat e pasme. Në kamerën kryesore do të përdoret sensori 52MP IMX789, i cili do të shoqërohet nga ajo ultrawide 50MP dhe telephoto 16MP.
Në raportime tregohet gjithashtu se Huawei P60 Pro do të fuqizohet nga një version 4G i proçesorit Snapdragon 8+ Gen 1, do të ketë bateri me kapacitet 5,500mAh dhe aftësi për karikimin e shpejtë 100W.
Pritet që në këto pajisje të mbështetet dhe komunikimi satelitor (kryesisht në shtetin e Kinës) që do të përdorë satelitët BeiDou.
