Red Bull ka bashkëpunuar me Memento Exclusives për të ofruar një simulator lojrash të bazuar në modelin shumë të suksesshëm RB18, duke i dhënë entuziastëve të F1 një mundësi për të shijuar garimin nga shtëpia e tyre.
Red Bull fitoi 17 gara nga 22 të tilla me modelin RB18 në vitin 2022, ndërkohë që Max Verstappen arriti titullin e dytë sezonal me ndihmën e kolegut të tij Sergio Perez.
Tashmë dizajni i Red Bull do të nderohet me disa simulatorë të rinj statikë, të cilët do të prodhohen me të njejtin proçes me të cilin prodhohen makinat e vërteta të F1 në zyrat qendrore të Memento Exclusives në Northamptonshire.
Simulatorët do të vijnë në 2 edicione speciale: “The Champions Edition” dhe “The Race Edition”, të cilët do të kushtojnë £99,999 dhe £74,000 respektivisht, dhe do të jenë të disponueshme për t’u blerë në platformën F1 Authentics. Pritet që brenda këtij muaji të nisin dorëzimet e porosive të para të simulatorëve.
“Ne jemi tepër krenar që kemi krijuar në bashkëpunim një ekperiencë unike garimi që i vendos drejtuesit në kabinën e modelit fitues të kapionatit RB18.” tha drejtuesi i ekipit të Red Bull, Christian Horner. “Drejtimi i një makine të Formula 1 është një ëndërr për shumë prej nesh, mirëpo nëpërmjet këtij simulatori ju do të jeni shumë pranë eksperiencës reale. Memento Exclusives kanë rikrijuar këtë makinë për të sjellë pistën e garimit në shtëpinë tuaj.”
