Rusia, shteti që na solli Tetris, po kërkon të krijojë industrinë e saj të lojërave video, e cila do të përfshijë zhvillimin e një konsole të re. Gjatë një takimi socio-ekonomik këtë javë, presidenti rus Vladimir Putin urdhëroi qeverinë e tij të shqyrtojë çështjen, sipas raporteve të mediave lokale.
Dekreti i qeverisë kërkon në mënyrë specifike që Rusia të shikojë prodhimin e “konsolave të video-lojrave të palëvizshme si dhe portative“, së bashku me një sistem OS dhe cloud për ofrimin e lojërave te klientët. Putin e nxori urdhrin kur të gjithë prodhuesit kryesorë të lojërave video – duke përfshirë Sony, Microsoft dhe Nintendo – kanë ndalur shitjet zyrtare në Rusi, pas pushtimit të vendit në Ukrainë.
Pavarësisht ndalimit të shitjeve, shitësit vendas rusë janë ende duke gjetur mënyra për të importuar konsola të huaja video lojërash. Por duket se Kremlini sheh një mundësi për të krijuar industrinë e vet vendase të lojërave video mes sanksioneve të ashpra ekonomike nga Perëndimi. Putin i ka dhënë qeverisë një afat deri më 15 qershor për të studiuar propozimin ambicioz.
Kryeministri rus Mikhail Mishustin do të mbikëqyrë përpjekjen. Por është e qartë se sipërmarrja nuk do të jetë e lehtë. Gazeta ruse Kommersant raporton se Putin ka të ngjarë të ketë besuar kompaninë ruse të teknologjisë VK për të zhvilluar këtë plan. Sidoqoftë, gazeta shton: “Pjesëmarrësit e tregut thonë se nuk ka mundësi për të prodhuar konsola si PlayStation dhe Xbox, dhe krijimi i një sistemi të tillë nga e para do të zgjasë deri në dhjetë vjet.”
Megjithatë, Kommersant thotë se një opsion më realist është që Rusia të inspirohet nga produktet kineze të video-lojërave për të krijuar një konsolë portative të ngjashme me Steam Deck të Valve.
