Një hungarez nga Budapesti ka vendosur një rekord të ri botëror për maratonën më të gjatë të luajtjes së një videoloje, duke luajtur Dance Dance Revolution për 6 ditë rresht. Szabolcs Csépe, 34 vjeç, i njohur në rrjetet e tij si GrassHopper, interpretoi mbi 3000 këngë dhe dogji më shumë se 22.000 kalori gjatë sfidës që i solli atij njohjen zyrtare nga Guinness World Records.
Përgatitjet e Csépe zgjatën 6 muaj dhe përfshinë trajnim fizik për forcimin e këmbëve dhe vitheve, si edhe një regjim të rreptë ushqimor. Ai e përshkroi përvojën si “të lodhshme por të gëzueshme”, duke theksuar se pasioni për lojën e ndihmoi të përballonte lodhjen ekstreme. Sipas rregullave të rekordit, çdo orë loje i siguronte 10 minuta pushim, të cilat mund t’i akumulonte për të fjetur një ose dy orë.
Dance Dance Revolution, e krijuar në Japoni në vitin 1998, është një lojë ritmike ku lojtarët ndjekin sinjale muzikore duke shtypur shigjeta me këmbë në një platformë. Loja po përdoret gjërësisht për promovimin e ushtrimeve fizike në shkolla të Mbretërisë së Bashkuar dhe SHBA-së, madje në vitin 2004 u njoh si sport zyrtar në Norvegji. Në vitet e fundit, ajo është bërë pjesë e garave esportive ndërkombëtare.
Csépe u frymëzua nga rekordi i mëparshëm i amerikanes Carrie Sëidecki, e cila në vitin 2015 luajti Just Dance për më shumë se 138 orë. Por ai nuk ishte fillestar në sfida të tilla: më parë kishte thyer rekorde për maratona në lojërat Naruto (28 orë), Tetris Effect (32 orë) dhe Gran Turismo 7 (90 orë).
Pas arritjes së fundit, inxhinieri i IT-së tha se është gati të rikthehet në pistë nëse dikush tjetër e sfidon rekordin e tij, i vendosur të mbetet “mbreti i kërcimit” në botën e videolojërave.
