Me mungesën e eventit të përvitshëm E3, Sony është përgatitur për të organizuar eventin e parë madhor të këtij viti përmes PlayStation Showcase, i cili do të zhvillohet në datën 24 maj.

Ju mund ta ndiqni këtë event live në faqjen zyrtare të PlayStation në YouTube ose Twitch duke nisur nga ora 22:00.

Për çfarë do të flitet në këtë event?

Ne dimë se Sony është duke zhvilluar disa lojra të mëdha, dhe pasi të lançohet Final Fantasy XVI në datën 22 qershor për PS5, e gjithë vëmendja do të shkojë drejt Spider-Man 2 nga Insomniac si dhe lojës Wolverine. Pritet që Spider-Man 2 të prezantohet në shtator të këtij viti.

Nga ana tjetër Naughty Dog ka vendosur të zgjerojë universin post-apokaliptik me lojën multiplayer The Last of Us, ndërkohë që Guerrilla Games do të vazhdojë me zhvillimin e një loje multiplayer Horizon. Gjithashtu gjatë këtij eventi do të kemi rastin që të shikojmë se çfarë gjërash të reja ka krijuar Haven Games që pas blerjes nga Sony.

Sony ka konfirmuar se gjatë Showcase do të shfaqen dhe përmbajtje nga palët e treta, si dhe lojra të tjera nga partnerët e kompanisë. Mortal Kombat 1 do të prezantohet në shtator, dhe Showcase do të shërbejë si një event për prezantimin për herë të parë të gameplay-t të kësaj loje. Mundet që të shikojmë dhe detaje të reja nga Death Stranding 2 apo Tekken 8, mirëpo loja më e mirë nga palët e treta pritet të jetë Final Fantasy VII Rebirth.

Gjithashtu Sony do të ketë një hapësirë të rezervuar për të diskutuar në lidhje me lojrat që do të kenë një version për PC.