Google po zhvillon një inteligjencë artificiale të bazuar në DeepMind që mund të jetë partneri juaj virtual më i mirë për sa i përket botës së video-lojrave. Nuk është ndonjë kundërshtar ose super-bot, por një agjent i përgjithshëm dhe i udhëzueshëm i AI që luan lojëra me ju.
Google prezantoi një artikull kërkimor mbi atë që e quan një Scalable Instructable Multiworld Agent (SIMA). Ideja e përgjithshme është se është një AI që mëson nga mënyra juaj e luajtjes së lojës dhe që mund të ndjekë udhëzimet verbale duke kuptuar botën virtuale në të cilën ndodhet. Në vend që të funksionojë si një kundërshtar ose robot i koduar i AI me të cilin jemi mësuar gjatë dekadave, SIMA e Google premton të jetë një shoqërues lojërash tepër i natyrshëm, si të ishte një njeri.
Google bashkëpunoi me tetë studio lojërash për të testuar modelin e saj SIMA në lojëra duke përfshirë Valheim, Goat Simulator 3 dhe No Man’s Sky. Këto janë lojëra open-world të zgjedhura për t’i mësuar SIMA-s aftësitë e përgjithshme të lojërave. Versioni aktual i SIMA është i aftë të kryejë rreth 600 lëvizje bazë, duke përfshirë navigimin, ndërveprimin me objektet dhe përdorimin e menysë.
Kushdo që ka luajtur lojën No Man’s Sky, e di se mbledhja e materialeve dhe ndërtimi është një proces i lodhshëm dhe t’i japësh instruksione një lojtari të fuqizuar nga AI që të dalë dhe të gjejë oksigjen ose të ndërtojë një bazë do të ndihmonte vërtet.
Rezultatet e hershme duken premtuese. Google thotë se një agjent i trajnuar SIMA performoi pothuajse po aq mirë në një lojë të re sa një agjent i trajnuar posaçërisht për të. Kjo është thelbësore nëse një agjent i tillë do të jetë i dobishëm për lojtarët e vërtetë. Nëse një lojë tipike zgjat dhjetëra deri në qindra orë, një shoqërues i AI duhet të jetë i aftë nga skena e hapjes, përndryshe lojtarët thjesht nuk do ta përdorin.
