Nga data 26 deri më 28 nëntor 2025, distrikti financiar King Abdullah Financial District do të shndërrohet në një skenë të re për dizajnin dhe kreativitetin ndërkombëtar, falë debutimit të Salone del Mobile.Milano në Lindjen e Mesme me ekspozitën “Red in Progress. Salone del Mobile Milano meets Riyadh”.
Ky event zhvillohet në partneritet strategjik me Komisionin e Arkitekturës dhe Dizajnit të Ministrisë së Kulturës të Arabisë Saudite dhe përfaqëson hapin e parë drejt një platforme të përhershme që do të kulmojë me edicionin e madh të vitit 2026. Pjesëmarrës do të jenë mbi 35 marka italiane dhe dizajnerë sauditë, duke krijuar ura të reja bashkëpunimi mes Italisë dhe Mbretërisë, në përputhje me objektivat e Vision 2030 për zhvillimin e ekonomisë krijuese.
Drejtoresha ekzekutive e Komisionit të Arkitekturës dhe Dizajnit, Dr. Sumayah Al-Solaiman, theksoi se eventi do të forcojë pozicionin e Arabisë Saudite në skenën globale të dizajnit dhe do të nxisë shkëmbimin profesional mes dizenjuesve vendas dhe ndërkombëtarë. Ndërsa Maria Porro, presidente e Salone del Mobile Milano, deklaroi se “Riad është vendi ku vizioni shndërrohet në qytet”, duke e përshkruar ekspozitën si një hapësirë bashkëpunimi, jo thjesht një vitrinë.
Instalacioni skenografik i studios milaneze Giò Forma do të paraqesë elemente që ndërthurin arkitekturën, dizajnin dhe simbolikën e ngjyrës së kuqe si energji dhe e ardhme. Ndërkohë, Lissoni & Partners do të projektojnë “Business Lounge”, një hapësirë për takime profesionale dhe prezantime me vendimmarrësit sauditë.
Programi do të përfshijë gjithashtu klasa të ndryshme, tryeza të rrumbullakëta dhe zona lifestyle, duke reflektuar mënyrën e jetesës italiane dhe duke nxitur bashkëpunimet midis markave, zhvilluesve dhe arkitektëve.
“Red in Progress” mbështetet nga Ministria Italiane e Punëve të Jashtme dhe Bashkëpunimit Ndërkombëtar (MAECI) dhe Agjencia Italiane e Tregtisë (ITA), duke theksuar përkushtimin për të forcuar lidhjet kulturore dhe ekonomike mes dy vendeve. Ky është një hap i rëndësishëm që shënon ardhjen e një prej ngjarjeve më prestigjioze të dizajnit botëror në zemër të Lindjes së Mesme.
