Në fillim të shtatorit 2025, qeveria e Nepalit vendosi të bllokojë aksesin në 26 rrjete sociale të mëdha, përfshirë Facebook, Instagram, YouTube, WhatsApp dhe X duke justifikuar këtë masë me arsyen se platformat nuk kishin regjistruar një zyrë lokale, një person përgjegjës për ankesat dhe një zyrtar për kontrollin e përmbajtjes sipas ligjit të ri për mediat sociale.
Vendimi nxiti zemërim të madh, veçanërisht te të rinjtë – që u quajtën “protestuesit e Gen Z” – të cilët e panë këtë bllokim si një përpjekje për shtrëngimin e lirisë së shprehjes dhe për kontroll shtetëror mbi internetin.
Protestat shpërthyen me mijëra veta duke marshuar drejt Parlamentit në Kathmandu dhe qytete të tjera. Atmosfera u tensionua kur protestuesit u përpoqën të thyhen barrierat që mbrojnë ndërtesat qeveritare, çka shkaktoi përballje me forcat e sigurisë. Policia reagoi me gaz lotsjellës, topa uji, plumba paralitikë dhe, në disa raste, plumba të vërtetë.
Për fat të keq, dhuna la pas të paktën 19 të vrarë dhe dhjetëra të tjerë të plagosur, përfshirë protestues dhe policë. Shumë prej të plagosurve kishin plagë të rënda nga plumbat në kokë ose kraharor.
Si pasojë e presionit publik dhe përhapjes së protestave, qeveria mori masa emergjente. Në një mbledhje të kabinetit, u vendos të tërhiqet vendimi për bllokimin: rrjetet sociale u rikthyen në funksion. Gjithashtu u premtoi kompensim familjeve të viktimave dhe trajtim falas për të plagosurit. U formua një komision hetimor për të zbardhur përgjegjësitë dhe për të propozuar masa që të mos përsëritet dhuna në të ardhmen.
Protestat padyshim reflektojnë probleme më të thella në Nepal: pakënaqësi ndaj korrupsionit, mungesë mundësish për të rinjtë, si dhe frikë për humbjen e lirisë së shprehjes dhe të aksesit në informacion. Vendimi për rivendosjen e rrjeteve sociale erdhi pas një kundërshtimi masiv, duke treguar se kur masa qeveritare perceptohet si arbritrare dhe censuruese, reagimi mund të jetë jo vetëm politik, por edhe shoqëror dhe shpesh tragjik.
