Në datën 15 qershor Banka e Shqipërisë prezantoi dy prerje të reja që do t’i bashkohen serisë së re të kartmonedhës shqiptare: 1000 Lekë dhe 10000 Lekë gjatë një ceremonie të veçantë të organizuar me këtë rast.
Kjo seri shfaqet me një dizajn të ri dhe modern, pa lënë anash elementët e reja të sigurisë që përfshihen në këto kartmonedha. Tashmë kartmonedha do të jetë më e sigurt ndaj falsifikimit dhe është krijuar nga një material më rezistent.
Kartmonedha 10000 Lekë, që do të futet për herë të parë në qarkullim, vjen në përmasat 160×72 mm dhe mbart portretin e poetit të shquar shqiptar Aleksandër Stavre Drenova, ose siç njihet ndryshe “Asdreni”. Në pjesën e pasme shfaqet flamuri kombëtar bashkë me një varg të zgjedhur nga Himni Kombëtar: “Rreth flamurit të përbashkuar / me një dëshir’ e një qëllim”.
Prerja e re 1000 Lekë vjen në përmasat 139×69 mm dhe ruan të njejtat motive të mëparshme, por ka të shtuar elementet e reja të sigurisë.
Këto dy kartmonedha do të hidhen në treg duke filluar nga data 30 qershor 2021.
