Satelliti Starcloud-1 pritet të bëjë histori duke dërguar në orbitë NVIDIA H100, kartën grafike më të fuqishme ndonjëherë të përdorur në hapësirë. Kjo GPU është rreth 100 herë më e fuqishme se çdo GPU që ka fluturuar deri tani jashtë Tokës. Sateliti do të niset muajin e ardhshëm me raketën SpaceX Falcon 9. Qëllimi është të testohet se si mund të funksionojnë qendrat e të dhënave në hapësirë dhe të përgatitet rruga për krijimin e një infrastrukture të madhe orbitale të përpunimit të të dhënave.
Kompania Starcloud, me seli në Redmond, synon të zhvendosë një pjesë të përpunimit të të dhënave nga Toka në orbitë. Aktualisht, qendrat tokësore të të dhënave konsumojnë energji të mëdha, ujë dhe prodhojnë zhurmë e emetime të karbonit. Në hapësirë, furnizimi me energji të ripërtëritshme nga Dielli është i bollshëm, ndërsa ftohja dhe zhurmat nuk përbëjnë problem. Kompania pohon se ndonëse lëshimi i satelitëve ka kosto mjedisore, përfitimet afatgjata do të rezultojnë në një ulje të madhe të emetimeve të CO₂.
Megjithatë, për këtë vizion nevojitet që kostot e dërgimit në orbitë të bien. Starcloud parashikon që kjo do të bëhet e mundur kur raketa gjigante Starship e SpaceX të jetë plotësisht funksionale në fillim të viteve 2030. Sipas CEO-së së kompanisë, në dhjetë vitet e ardhshme shumica e qendrave të reja të të dhënave mund të ndërtohen në hapësirë.
Starcloud-1 do të testojë përpunimin në orbitë të imazheve me rezolucion të lartë nga satelitët vëzhgues të Tokës, duke reduktuar vonesat që aktualisht shkaktohen nga transmetimi i të dhënave. Sateliti do të ekzekutojë gjithashtu modelin gjuhësor të Google, Gemma, një tjetër risi për hapësirën. Nëse misioni rezulton i suksesshëm, do të pasojnë satelitë më të fuqishëm me GPU si NVIDIA Blackwell, duke rritur më tej kapacitetin e përpunimit në orbitë.
