Më 30 prill, Piramida u kthye në një hapësirë informimi, ndërgjegjësimi dhe promovimi mbi stilin e jetesës dhe reduktimin e risqeve duke e trajtuar këtë koncept jo vetëm në lidhje me sëmundjet, por me një qasje praktike ndaj dëmit dhe alternativave që ndikojnë pozitivisht në shëndetin tonë.
Konferenca mblodhi përfaqësues nga Ministria e Shëndetësisë dhe Mbrojtjes Sociale, Instituti i Shëndetit Publik, Fakulteti i Mjekësisë, si dhe profesionistë nga fusha të ndryshme si psikologjia, dentistria, toksikologjia, nutricioni, aktiviteti fizik, media dhe teknologjia, për të diskutuar mbi rolin e secilit në ndërtimin e zakoneve të shëndetshme.
Freskida Miloti, si organizatore dhe moderatore, theksoi rëndësinë e organizimit të këtyre konferencave për të krijuar një platformë komunikimi, promovimi dhe ndërgjegjësimi, jo vetëm për t’u njohur me risitë dhe studimet më të fundit nga fusha e mjekësisë, por për të bashkuar profesionistë nga disiplina të ndryshme, ku secili ka një rol të rëndësishëm në përmirësimin e stilit të jetesës dhe reduktimin e risqeve.
Në fjalën përshëndetëse, Prof. Dr. Mira Rakacolli, Zv/Ministre e Shëndetësisë, vlerësoi konferencën dhe nënvizoi rëndësinë e parandalimit në kujdesin shëndetësor:
Në përgjithësi, në sfidat e shëndetit, fokusi ka qenë te sëmundja dhe kurimi, por në fakt ajo që duhet të ketë vëmendjen më të madhe është parandalimi.
Prof. Dr. Mira Rakacolli, Zv/Ministre e Shëndetësisë
Këtë qasje e mbështeti edhe Zv/Rektorja e Universitetit të Mjekësisë, Prof. Suela Këlliçi, e cila theksoi se parandalimi dhe reduktimi i riskut janë ndër instrumentet kyçe në përmirësimin e stilit të jetesës – një mision që promovohet edhe nga vetë universiteti.
Dr. Adrian Hoxha, drejtues i Shoqatës Kombëtare të Shëndetit Publik, theksoi se koncepti i reduktimit të dëmit nuk i përket më vetëm fushës së shëndetësisë:
Masat që marrim dhe alternativat që ofrojmë, sidomos për grupet në risk – si konsumatorët e duhanit, alkoolit apo substancave – kanë një rëndësi të veçantë. Duhet të punojmë së bashku që këto grupe të mos stigmatizohen, por të mbështeten përmes informacionit dhe alternativave të duhura.
Dr. Adrian Hoxha, drejtues i Shoqatës Kombëtare të Shëndetit Publik
Në lidhje me shëndetin mendor, Prof. Gentiana Qirjako, Shefe e Sektorit të Promocionit Shëndetësor në Institutin e Shëndetit Publik, prezantoi punën e Aleancës kundër Depresionit, si një iniciativë që synon të forcojë diskutimin mbi shëndetin mendor në nivel komunitar, sidomos për grupet në risk.
Nga kjo u ngrit edhe thirrja për ndërtimin e një kulture të kontrolleve periodike, testimeve, diagnostikimit dhe parandalimit të sëmundjeve të lidhura me stilin e jetesës.
Në panelet që pasuan, ku u diskutua mbi reduktimin e riskut, farmaceutikën dhe lëvizjen, u theksua domosdoshmëria për kujdes të veçantë kur flitet për produktet e duhanit – gjithmonë duke u mbështetur në fakte dhe studime shkencore. U vu në dukje edhe ndikimi i tyre në shëndetin oral, si dhe shqetësimi në rritje për aksesin që të rinjtë kanë ndaj këtyre produkteve. Ndërkohë, aktiviteti fizik u vlerësua si një faktor kyç në mirëqenien e individit dhe komunitetit, jo vetëm në aspektin fizik, por edhe në atë mendor dhe social.
U diskutua gjithashtu roli i gjenetikës në ndërtimin dhe ruajtjen e një stili jetese të shëndetshëm. U theksua rëndësia e një diete të balancuar, e konsultimit të vazhdueshëm me specialistë dhe u bë thirrje për shmangien e vetë-diagnostikimit dhe përdorimit të pakontrolluar të suplementeve.
Në një tjetër prezantim, toksikologia Dr. Sonila Bitri trajtoi çështjen e abuzimit me substancat e dëmshme dhe ndikimin e tyre në stilin e jetesës. Përdoruesit e duhanit, alkoolit dhe substancave të dëmshme, pavarësisht zgjedhjeve që kanë bërë, nuk mund t’i përjashtojmë, por duhet të ofrojmë mbështetje dhe alternativa më pak të dëmshme. Ajo theksoi se:
Ndalimi dhe stigmatizimi nuk janë zgjidhje për këtë grup në risk. Ilaçi kundër varësisë është lidhja me njëri-tjetrin, mbështetja dhe ofrimi i alternativave.
Dr. Sonila Bitri
Në kuadër të politikave për varësinë dhe reduktimin e dëmit, u lançua edhe manuali i përgatitur me kontributin e Shoqatës Kombëtare të Shëndetit Publik.
Paneli i fundit iu kushtua rolit të medias dhe teknologjisë në edukimin për shëndetin – një diskutim mes gazetarësh, ekonomistësh dhe ekspertësh të teknologjisë. Teknologjia u vlerësua si një aleat i rëndësishëm në ndërtimin e një rutine të shëndetshme, por edhe si mjet për të sinjalizuar probleme shëndetësore përmes pajisjeve të vetë-monitorimit. Gjithashtu, ajo u konsiderua një mënyrë për të larguar individët nga zakonet e dëmshme dhe për të përqafuar sjellje më të shëndetshme.
Gazetarja Mira Kazhani theksoi rëndësinë e krijimit të një vetëdijeje mbi përmbajtjen që ndjekim në rrjetet sociale, duke e parë mjekun si figurë kyçe në edukimin për shëndetin.
Ndërsa Brenton Bënja, gazetar teknologjie dhe themeluesi i Geek Room, deklaroi:
Pavarësisht se teknologjia, përmes pajisjeve të vetë-monitorimit, mund të jetë një mjet shumë i mirë për të sinjalizuar një anomali, gjithmonë duhet t’i drejtohemi mjekut.
Brenton Bënja, gazetar teknologjie dhe themeluesi i Geek Room
Deklaratë që u mbështet edhe nga pjesa tjetër e panelistëve.
“Lifestyle Conference” u mbyll me një mesazh të qartë: të përqafojmë zakone të shëndetshme dhe të shohim mirëqenien si një përgjegjësi e gjithsecilit – jo vetëm e mjekut. Me përfshirjen e konceptit të reduktimit të dëmit, këto platforma krijojnë mundësi reale për reduktimin e riskut në nivel individual dhe komunitar.
