Netflix ka vendosur që të emërojë në rolin e drejtuesit ekzekutiv të filmave aksion Terminatorin Arnold Schwarzenegger. Kjo gjë u bë e ditur përmes një video promocionale të publikuar në adresën zyrtare të Netflix në YouTube, dhe ne mund të shikojmë se si Schwarzenegger vjen në zyrat qendrore të kompanisë me një tank.

“Askush nuk e dashuron aksionin më tepër se unë. Kjo është arsyeja se përse unë e pranova këtë ofertë mjaft të rëndësishme të Netflix për të qenë drejtues ekzekutiv për kategorinë e filmave aksion.” tregon ai në video.

Schwarzenegger do të debutojë në datën 25 maj në serialin FUBAR të Netflix, i cili sigurisht është një serial plot aksion.

Në një deklaratë për shtyp Netflix shtoi: “Kështu që nëse ju dëshironi të shikoni rolin e parë të Schwarzenegger në FUBAR, rikthimin e shumëpritur të Chris Hemsworth në Extraction 2, sezonin e ri të The Witcher me Henry Cavill apo Gal Gadot si një heroinë e patrembur në Heart of Stone, duhet të dini se Arnold po punon me orare të zgjatura për t’ju sjellë filmat dhe serialet më eksplozive në botë.”