Gjendet të paktën një palë që nuk është shumë e kënaqur nga suksesi i madh që seriali Squid Game regjistroi: pikërisht ofruesit e shërbimit të internetit SK Broadband. Sipas Reuters, SK Broadband po padit Netflix me pretekstin se kjo kompani duhet të paguajë për kostot e mirëmbajtjes që janë rritur shumë herë pasi njerëzit po shikojnë shumë përmbajtje në platformë.

SK Broadband ka përllogaritur se Netflix i detyrohet atyre $22.9 milionë vetëm në 2020. Ky ISP është përgjegjës për të paktën 1,200 Gigabit të dhëna nga Netflix të proçesuara në sekondë për muajin shtator. Kjo sasi është 24-fishuar nga e njejta periudhë në 2018, dhe seriali Squid Game është një ndër “fajtorët” kryesor.

Mirëpo Netflix nuk i intereson aspak kjo gjë. Kompania ka apeluar menjëherë këtë ankesë. Para disa ditësh, Netflix publikoi një shkrim në blog ku detajonte kontributet e saj në ekonominë e Koresë së Jugut, ku ka punësuar mbi 16,000 persona dhe ka krijuar një rritje prej $4.8 miliardë. Sipas postimit, Netflix thotë se ka qenë “platforma që ka ndihmuar në shpërndarjen e kulturës Hallyu përmes serialeve si Kingdom, Vincenzo dhe Squid Game”.

Në postim përmendej gjithashtu se Squid Game ishte seriali i parë korean që arriti të renditej në vendin e parë në Netflix US.