Hakerat iranianë kanë vazhduar aktivitetin e tyre të krimit kibernetik, kësaj here duke sulmuar kompanitë shqiptare One Albania dhe Air Albania, si dhe parlamentin shqiptar.
Nëpërmjet postimeve të bëra në website-in e tyre dhe Telegram ata kanë treguar prova që kanë arritur të aksesojnë të dhënat e kompanive, madje në postim tregohet se të dhënat e klientëve të kompanisë ONE mund të jenë fshirë. Nuk dihet ende se deri në çfarë niveli arrin dëmi i bërë nga Homeland Justice, ndërkohë që aplikacioni MyOne është jashtë funksionit.
“Albanian Mobile Communications (AMC) u hakerua nga Homeland Justice. Injorimi i “paralajmërimeve humanitare” tona nga politikanët tuaj të korruptuar shkaktoi të gjithë këtë. Por mos u mashtroni. Kjo do të vazhdojë deri sa ne ta pastrojmë tërësisht vendin nga terroristët.
Në këtë operacion,më tepër se 2 petabyte të dhëna në rrjetin e telekomunikacionit dhe atij të brendshëm të kompanive të përfshira janë fshirë, dhe të dhëna të rëndësishme do të publikohen së shpejti! Ne vetëm dëshironim të përcillnim një mesazh. Shpresojmë të ketë funksionuar!”
Homeland Justice
Air Albania nuk ka ende një deklaratë rreth hakerimit por detajet e nisjeve nga Tirana International Airport tregojnë se fluturimet e sotme nuk janë prekur duke fluturuar sipas orareve të caktuara. Në postimin ku tregohet se dhe Air Albania është hakeruar nga Homeland Justice, i përfshirë është dhe ky mbishkrim:
“Të dhënat e Air Albania janë tashmë në duart tona. Ekipi i Homeland Justice ka akses në të dhënat e kompanisë. Më pas ne fshimë ‘të dhënat që zinin hapësirën’ në servera. Të gjitha bizneset dhe personat juridikë janë të sigurtë nëse nuk mbrojnë dhe mbështesin terroristët e huaj të lokalizuar në Durrës.
Prisni për lëvizjen tonë të rradhës…”
Homeland Justice
Një mbishkrim shoqëron dhe postimin ku lajmërohet hakerimi i parlament.al.
“Anëtarët e korruptuar të parlamentit së shpejti do të shokohen kur të kuptojnë se si djalli brenda tyre po i demonstrohet çdo kërkuesi të së vërtetës.”
Homeland Justice
Update: 18:30 – One Albania ka dalë me një deklaratë zyrtare mbi sulmin kibernetik nga Homeland Justice.
Ekipet tona të sigurisë kibernetike kanë zbuluar dhe po trajtojnë në mënyrë aktive një incident të sigurisë kibernetike ndodhur së fundmi.
Pavarësisht këtij sulmi, shërbimet e One Albania kanë qenë të pandikuara dhe kanë funksionuar normalisht gjatë gjithë ditës, duke përfshirë shërbimet për klientët si celular, fiks dhe IPTV.
Ekipet tona teknike po punojnë me kapacitet të plotë dhe në bashkëpunim të ngushtë me institucionet shtetërore AKEP dhe AKCESK për të siguruar që shërbimet dhe të dhënat të mbeten plotësisht të sigurta. Ne kemi marrë hapa të menjëhershëm për të përforcuar masat e sigurisë, duke përdorur ekspertizën dhe praktikat më të mira ndërkombëtare.
Ne mbetemi të përkushtuar për ruajtjen e transparencës dhe vlerësojmë mirëkuptimin dhe mbështetjen tuaj.
ONE Albania
Update: (25.12 / 21:05) – One Albania kërkon ndjesë duke dhuruar 5GB për dy ditë për abonentët.
Update: (26.12 / 14:00) – Kuvendi tregon përmes një deklarate zyrtare se nga hakerimi nuk ka patur humbje të të dhënave.
Gjatë ditës së djeshme është konstatuar një sulm kibernetik ndaj institucionit të Kuvendit të Shqipërisë. Sipas ekspertëve, nga ky sulm është synuar ndërhyrje në infrastrukturë dhe tentativë për fshirje të të dhënave. Ju bëjmë me dije se nuk janë prekur të dhënat në sistem dhe ekspertët janë angazhuar plotësisht, që prej momentit kur kanë detektuar këtë ndërhyrje nga jashtë institucionit.
Ekspertët e IT po punojnë për të zbuluar se çfarë pasojash ka sjellë ky sulm në sistemin e Kuvendit të Shqipërisë. Për sa më sipër, dalja LIVE e shërbimeve kërkon kohë pasi po kontrollohen të gjitha detajet dhe vijon puna për të kthyer në normalitet faqen e Kuvendit të Shqipërisë.
Kuvendi i Shqipërisë
