Mercedes ka vendosur që të përmirësojë akoma më tepër dizajnin e krahut të përparmë, dhe zgjodhi pikërisht British Grand Prix për ta prezantuar këtë ndryshim.
Dizajni i ri vazhdon të ruajë disa nga karakteristikat e dizajnit paraardhës, si përshembull fletët gjysmë të shkëputura apo bashkimi në pjesën fundore. Megjithatë ka një ndryshim të madh në mënyrën se si pesha është shpërndarë në dizajnin e ri dhe në mënyrën e ndërveprimit me hundën e makinës.
Bashkimi trekëndor në skajin e pjesës së përparme të makinës është zëvëndësuar me një dizajn më të rrumbullakët. Gjithashtu dhe hapësira ku ruhej sensori me rreze infra të kuqe për gomat është ripozicionuar si pasojë e këtij ndryshimi, duke u vendosur në një pozicion që ofron më tepër performancë nga pikëpamja aerodinamike.
Konturet e kësaj pjese janë dizenjuar për të qenë më të harkuara, për t’u përshtatur me seksionin e jashtëm të pistës.
Mercedes ishte skuadra e parë që prezantoi kllapat e reja aerodinamike, por nuk i përdori asnjëherë në makinat që garonin, ndërkohë që Ferrari i ka përdorur ato gjatë gjithë sezonit në krahun e tij të përparmë. Haas ka instaluar edhe variantin e vet kohët e fundit.
