CEO i SpaceX dhe Tesla, Elon Musk është tashmë aksioneri më i madh në Twitter, pasi bleu 9.2% të kompanisë. Pas këtij investimi, kompania tregoi se Musk do të ishte një anëtar i ri i bordit të drejtuesve për një periudhë 2 vjeçare, mirëpo përmes një tweet-i gjatë ditës së dielë, CEO i Twitter, Parag Agrawal lajmëroi se Musk nuk do t’i bashkohet këtij bordi.
Këto zhvillime e kanë vendosur kompaninë në një situatë të vështirë. Personi më i pasur në botë, i cili njihet për ambiciet e tij, shpirtin inovativ dhe sjelljen mjaft të paparashikuar, duket se ka dëshirën të bëjë disa ndryshime rrënjësore në këtë kompani, dhe pse planet e tij nuk janë shumë të qarta.
Ardhja e Elon Musk e ka vështirësuar disi punën e CEO-s të ri, i cili po përpiqet të dalë nga hija e Jack Dorsey që dorëzoi rolin e tij në nëntor të vitit të kaluar. Musk deklaroi para pak kohësh përmes një tweet-i se nuk ishte i kënaqur me politikat e platformës mbi fjalën e lirë, dhe kjo mund të jetë një ndër pikat më të rëndësishme ku ai do të tentojë të sjellë një ndryshim.
Këtë ndryshim ai mund ta sjellë më lehtë, për sa kohë Agrawal është ende i ri në detyrë dhe nuk ka arritur të krijojë ende një figurë drejtuese të denjë.
