Disa nga mendjet më të ndritura, si Albert Einstein dhe Charles Darwin, shfaqën sjellje të çuditshme ndërkohë që ndërvepronin me njerëz të tjerë. Dhe pse nga shumë persona këto zakone cilësohen si të çuditshme, studime të shumta i kanë lidhur ato me të paturit e IQ të lartë.
Kjo vjen për shkak se praktikat tona të përditshme kanë një ndikim të madh në inteligjencën tonë – dhe madje mund të ndryshojnë mënyrën se si ne mendojmë. Dhe psikologët kanë identifikuar të paktën shtatë sjellje të çuditshme që ata besojnë se janë karakteristike të një gjeniu.
Të folurit me veten
Nëse flet me veten, nuk je i çmendur. Në fakt mund të jetë një shenjë se ju jeni më i zgjuar se personi mesatar. Edhe pse kjo sjellje është disi irracionale, një numër në rritje i provave kanë sugjeruar se ajo ka përfitime të mëdha të aftësive njohëse – duke përfshirë kujtesën më të mirë, besimin, fokusin dhe më shumë.
Në një studim të vitit 2012, një ekip studiuesish amerikanë u treguan pjesëmarrësve 20 fotografi të objekteve të ndryshme dhe u kërkuan atyre të gjenin një të veçantë. Shkencëtarët zbuluan se njerëzit që flisnin me veten ndërsa shikonin imazhet ishin në gjendje ta identifikonin objektin më shpejt.
Qëndrimi zgjuar në orët e vona
Një studim, i botuar në janar, analizoi të dhënat nga 26,000 të rritur, duke zbuluar se ata që qëndrojnë zgjuar deri vonë shënuan rezultate dukshëm më të larta në testet njohëse sesa ata që zgjohen herët. “Bufat e natës” kishin rezultate rreth 13.5% më të larta se “personat e mëngjesit”.
Shkëputja nga bota reale
Dhe pse shpesh herë kjo gjë vërehet tek personat të cilëve u mungon përqëndrimi, shkencëtarët kanë treguar se kjo është një shenjë që tregon se jeni inteligjentë dhe kreativë.
Studimi i Eric Schaumer, një profesor psikologjie, zbuloi se njerëzit që raportojnë më shumë shkëputje të tilla të vëmendjes kanë rezultate më të larta në testet e aftësive intelektuale dhe krijuese.
Performancë e lartë dhe në rrëmujë
Disa njerëz nuk e durojnë dot një dhomë apo tavolinë të çrregullt. Por njerëzit shumë inteligjentë nuk duket se shqetësohen nga kjo – ose ndoshta edhe e preferojnë atë. Një ekip studiuesish vendosi të përcaktojë pse ndodh kjo.
Ata i vendosën pjesëmarrësit e studimit në një hapësirë zyre të çrregullt ose të rregullt dhe u kërkuan atyre të gjenin përdorime të reja për topat e ping-pongut. Megjithëse të dy grupet dolën me një numër të ngjashëm idesh, studiuesit zbuluan se pjesëmarrësit në dhomën e çrregullt dolën me ide më kreative dhe interesante.
Bëjnë shumë pyetje
Nëse vazhdimisht pyesni se si funksionojnë gjërat dhe dhjetëra pyetje të tjera që ju lindin në kokë, ju ndoshta jeni shumë inteligjent. Kurioziteti është një nga shenjat më të zakonshme të inteligjencës. Është një shenjë që mendja juaj kërkon gjithmonë të kuptojë botën përreth jush.
Të qënurit introvert
Shumë gjeni kanë qenë të njohur për qëndrimin për kohë të gjata në vetmi dhe qetësi. Sigurisht kjo ka kuptim – mund të jetë e vështirë të përqendroheni ndërsa jeni i rrethuar nga muhabeti dhe stimulimi i vazhdueshëm i një mjedisi shoqëror. Plus, studimet kanë treguar se introvertët priren të përfshihen në përpunim më të thellë të informacionit sesa ekstrovertët.
Lexojnë shumë libra
Personat inteligjentë janë gjatë gjithë kohës duke lexuar për të mësuar vazhdimisht informacione të reja, fjalë fjalori, ide komplekse dhe këndvështrime të ndryshme. Është si një stërvitje për mendjen. Për më tepër, leximi ndihmon në forcimin e fokusit mendor, imagjinatës dhe aftësisë sonë për të empatizuar me të tjerët. Njerëzit që lexojnë shumë po zhvillojnë vazhdimisht inteligjencën e tyre, që do të thotë se ata kanë më shumë gjasa të kenë një IQ të lartë.
