Gjatë ditëve të fundit mësuam se Wizz Air po planifikon të ofrojë një plan abonimi vjetor “All you can fly” që kushton €499 dhe do t’ju lejojë të fluturoni sa herë të dëshironi drejt destinacioneve të ndryshme përgjatë vitit. Pritet që ky plan të nisë së funksionuari nga shtatori i këtij viti.
Wizz Air tregon se në këtë mënyrë, pasagjerët do të mund të kursejnë para, të vizitojnë të afërmit e tyre më shpesh si dhe të organizojnë udhëtime spontane. Megjithatë jo gjithçka është kaq e thjeshtë sa duket, dhe pse ky plan abonimi është sold out në pothuajse të gjitha tregjet, pasi u ofruan vetëm 10,000 karta të tilla.
Personat e abonuar do të mund të rezervojnë një vend në avion vetëm 3 ditë para nisjes dhe duhet të paguajnë një tarifë prej €10 për fluturim. Gjithashtu nuk janë të përfshira as çantat që vendosen në hapësirën mbi kokën e pasagjerëve.
Pavarësisht suksesit për Wizz Air në këtë fushatë, ka shumë qytetarë të cilët kanë kritikuar këtë plan të kompanisë, madje duke shtuar se kompania mund të jetë në prag të falimentimit.
Dhe drejtuesi i RyanAir, Michael O’Leary, shprehu se nuk ishte aspak i bindur nga kjo praktikë e re e Wizz Air, madje e quajti atë një “mashtrim marketingu” në një intervistë për Newstalk Breakfast.
Kur intervistuesi e pyeti CEO-n e RyanAir nëse kompania e tij do ta konsideronte ndonjëherë një alternativë të tillë, ai u përgjigj:
“Jo, është një mashtrim për marketing. Ju mund të paguani €499 për të fluturuar sa herë të dëshironi në një destinacion por ju duhet të paguani €9 sa herë që rezervoni një udhëtim, dhe ju mund të rezervoni një vend vetëm 3 ditë para se avioni të niset, kështu që shumica e tyre do të jenë plot me pasagjerë, nuk do të ketë vende të lira. Është një marifet i mirë marketingu, por vetëm kaq.”
“Dhe të gjithë do ta kuptojnë se nëse duan të fluturojnë me çmime të lira në Evropë, qoftë në tregjet e Wizz Air apo në Irlandë, do të duan të zgjedhin RyanAir.”
