Coca-Cola ka vendosur të përfshihet më tepër në fushën e inteligjencës artificiale duke firmosur një marrëveshje të re me OpenAI.
Në deklaratën për shtyp ku lajmërohet arritja e kësaj marrëveshje nuk tregohet vlera monetare e partneritetit midis Coca-Cola, OpenAI dhe Bain. Megjithatë duke parë investimin prej miliarda dollarësh të Microsoft në këtë kompani, duket se ky partneritet do të jetë i suksesshëm.
Nëpërmjet një deklarate, CEO i Coca-Cola James Quincy tregoi se kompania “është tepër e kënaqur të prezantojë gjeneratën e re të kreativitetit të ofruar nga teknologjia e re që po përhapet shumë shpejt”.
“Ne shikojmë shumë mundësi për të përmirësuar marketingun tonë përmes inteligjencës artificiale më të avancuar, duke përmirësuar organizmin e biznesit dhe aftësitë tona.” shtoi Quincy.
Coca-Cola është kompania e parë që i bashkohet bashkëpunimit midis Bain dhe OpenAI. Dhe pse detajet e këtij partneriteti nuk janë bërë ende të ditura, besohet se qëllimi kryesor i bashkëpunimit do të jetë marketing, shitjet si dhe implementimi i teknologjisë në burimet njerëzore.
Kjo nuk është hera e parë që Coca-Cola përfshihet në tregun e inteligjencës artificiale. Në vitin 2017, kompania tregoi se do të niste të përdorte makineritë shitëse të fuqizuara nga AI si pjesë e strategjisë së re të biznesit me në fokus inteligjencën artificiale, që përdor algoritmet për të parashikuar se cilat shije do të jenë më të shiturat si dhe parashikime të tjera.
