Çfarë na lidh më shumë me njëri-tjetrin? Eksperiencat. Në Milan Design Week këto eksperienca u jetuan në një mënyrë krejtësisht të re – mes reales dhe surreales, natyrës dhe teknologjisë, mes krijuesve dhe vizitorëve që nuk ishin thjesht spektatorë, por protagonistë.
Kjo ishte dhe tema e këtij viti – “Connected Worlds”, një botë e lidhur që na fton të bashkëpunojmë, të eksperimentojmë dhe të krijojmë së bashku zgjidhje më të qëndrueshme dhe më emocionuese për të ardhmen.
Në vijim, disa nga instalacionet më interesante sipas Geek Room.
Google – Making the Invisible Visible
Google solli një nga instalacionet më magjike të këtij edicioni, Making dhe Invisible Visible. Drejtoresha e dizajnit në Google, Ivy Ross, në bashkëpunim me artistin Lachlan Turczan, krijuan një hapësirë ku uji dhe drita takohen për të formuar diçka të pazakontë – një objekt që duket solid dhe i prekshëm, por që zhduket kur i afrohesh.
Në këtë instalacion mund të lëvizje duart mes dritës, si të hapje një perde që të çon në një tjetër botë. Ishte një kujtesë por dhe një ndjesi e ҫuditshme, se ajo që dikur dukej e paarritshme – si teknologjia apo bota virtuale – tashmë është më pranë se kurrë.
Kia – Opposites United
Kia solli një tjetër risi përmes “Opposites United”, me një event që ngjante më shumë me një festival të pazakontë. “Eklipsi i Perceptimeve” ishte një përvojë e veçantë me diskutime, simpoziume dhe 12 performanca muzikore, të gjitha të ndërtuara mbi idenë e bashkëpunimit.
Koncepti ishte i thjeshtë, por i fuqishëm: kur artistët, dizajnerët dhe studiuesit punojnë së bashku, si në një eklips ku dielli dhe hëna takohen, lindin ide që ndriçojnë të ardhmen. Nga këto bashkëpunime burojnë dhe ide novatore të cilat kthehen më pas në produkte nga KIA.
IQOS x SELETTI – Curious X: Sensorium Piazza
IQOS dhe SELETTI sollën një nga instalacionet më novatore të këtij edicioni. Curios X: Sensorium Piazza, një ‘piazza’ atipike italiane, jo e zakonshme. Dikur një vendtakim për njohje dhe takime e transformuar në një hapësirë multisensoriale, ku vizitorët ishin në qendër të vëmendjes, kësaj rradhes si protagonist.
Nëpërmjet ndërthurjes së tingujve, dritave dhe teknologjisë çdo vizitor linte “gjurmën” e tij në instalacion. Një (r)evolucion në mënyrën sesi dizajni ndërvepron me teknologjinë për të krijuar eksperienca që na lidhin me njëri-tjetrin, me komunitetin dhe me botën. U larguam kuriozë, në pritje të asaj që ky bashkëpunim midis IQOS dhe SELETTI do të sjellë gjatë vitit 2025.
Library of Light – Es Devlin
Artistja dhe dizajnerja Es Devlin krijoi një nga instalacionet më poetike të javës. “Library of Light” ishte një librari me mbi 2,000 libra, ndërtuar si një strukturë që lëvizte ngadalë gjatë ditës, duke pasqyruar dritën e diellit mbi kolonat dhe statujat përreth – të cilat nuk prekeshin nga rrezet e diellit më parë.
Kjo hapësirë ishte një ftesë për reflektim – për të parë librin jo vetëm si burim dije, por si një udhërrëfyes drejt së ardhmes. Në mbrëmje, strukturat ndriçonin ambientin dhe krijonin një atmosferë magjike, të qete, ku vizitorët shëtisnin përgjatë rrugës së fjalëve të ndriçuara në mur.
Këto ishin disa nga instalacionet që na frymëzuan më shumë në Milan Design Week 2025. Ato na tregojnë se dizajni dhe teknologjia nuk janë vetëm për t’u parë, por për t’u përjetuar – dhe më e rëndësishmja, na sjellin më afër njëri-tjetrit, në mënyra që ndoshta nuk i kishim imagjinuar më parë.
