Presidenti i Ukrainës, Volodymyr Zelenskiy, ka dhënë argumente të shumta për mbrojtjen e shtetit të tij nga ajri, duke pyetur “sa njerëz duhet të vriten, apo sa këmbë e krahë duhet të gjymtohen para se mbështetësit e Ukrainës të detyrohen dhe të deklarojnë një zonë ndalim-fluturimi?”
Mirëpo çfarë është zona e ndalim-fluturimit?
Zona e ndalim-fluturimit është e krijuar për të penguar përdorimin e hapësirës ajrore në një vend të caktuar, pra në të nuk mund të lëvizin aeroplanët apo mjetet e tjera fluturuese. Në këtë zonë do të fluturojnë vetëm mjetet fluturuese që bëjnë kontrollin e hapësirës ajrore.
Për të arritur një kontroll të mirë duhet të bëhet pajisja me mjete survejimi që zbulojnë çdo thyerje të këtij kufiri nga një mjet fluturues, si avionët AWACS. E nevojshme është dhe pajisja me avionë luftarakë që janë të gatshëm të luftojnë në ajër dhe të parandalojnë sulmet e papritura në këtë hapësirë ajrore. Me avancimin e teknologjisë, avionët survejues nuk duhet të kërkojnë vetëm për avionë të tjerë që futen në këtë zonë, por edhe për dronë e shumë mjete të tjera të sofistikuara.
I gjithë qëllimi i këtij pengimi është mbrojtja qytetarëve që banojnë në një hapësirë të caktuar nga sulmet ajrore apo mbështetja e tyre me ndihmat e nevojshme.
Në 1992 gjatë konflikteve në Ballkan, OKB pranoi një rezolutë e cila dënonte të gjitha fluturimet ushtarake të paautorizuara në hapësirën ajrore të Bosnjes.
Megjithatë, dhe pse Ukraina po bën thirrje të forta për mbështetje përmes krijimit të një zone ndalim-fluturimi, NATO nuk po konsideron marrjen e një hapi të tillë. Ata besojnë se nëse do të ketë një përballje të avionëve të perëndimit me ato të Rusisë, situata mund të përshkallëzohet duke nisur kështu një Luftë të 3-të Botërore, që do të ishte shkatërrimtare për planetin nëse do të përdoren armët bërthamore.
