Pavel Durov, themeluesi miliarder i aplikacionit Telegram, zbuloi në një intervistë për revistën Le Point se planifikon të lërë pasurinë e tij – që Bloomberg e vlerëson rreth $13.9 miliardë– për më shumë se 100 fëmijët që ka sjellë në jetë, si në mënyrë natyrale, ashtu edhe përmes donacioneve të spermës. Ai theksoi se të gjithë fëmijët do të kenë të njëjtat të drejta trashëgimie, por vetëm 30 vjet pas vdekjes së tij, për t’i nxitur të ndërtojnë jetën vetë.
Durov tha se filloi të dhuronte spermë 15 vite më parë për të ndihmuar një shoqe, dhe më vonë klinika e informoi se mbi 100 fëmijë janë konceptuar nga dhurimet e tij në 12 shtete. Megjithëse pasuria e tij teorike është e madhe, ai sqaroi se asetet e tij likuide janë shumë më të vogla dhe vijnë kryesisht nga investimet në bitcoin që nga viti 2013, jo nga Telegram, të cilin nuk ka ndërmend ta shesë.
Ai shkroi testamentin e tij për shkak të rreziqeve që mbart puna e tij. Sipas tij, mbrojtja e lirive digjitale i ka sjellë armiq, përfshirë edhe shtete të fuqishme. Durov thotë se dëshiron të mbrojë si fëmijët e tij, ashtu edhe kompaninë Telegram, për ta ruajtur besnikërinë ndaj vlerave themelore.
Intervista vjen pas arrestimit dhe padive të tij në Francë, ku përballet me akuza për përfshirje në shpërndarje të materialeve abuzive ndaj fëmijëve, transaksione të paligjshme dhe pastrim parash. Durov e quajti çështjen “absurde” dhe mohoi çdo faj.
Telegram e mbrojti Durov-in dhe deklaroi se respekton ligjet e BE-së, ndërsa pas arrestimit, njoftoi se do t’u dorëzojë autoriteteve të dhënat e përdoruesve që shkelin rregullat.
