Pavel Durov, miliarderi bashkëthemelues dhe shefi ekzekutiv i aplikacionit të komunikimit Telegram, u arrestua në aeroportin Bourget pranë Parisit të shtunën në mbrëmje, tha TF1 TV, duke cituar një burim të paidentifikuar.
Durov po udhëtonte me avionin e tij privat, tha TF1, duke shtuar se për të kishte një urdhër arresti në Francë. 39-vjeçari mësohet se po udhëtonte nga Azerbajxhani dhe u arrestua rreth orës 20:00 me orën lokale.
Sipas raporteve të mediave franceze, hetimi fokusohet në mungesën e moderimit në Telegram, për të cilin policia pretendon se lejon që aktivitetet kriminale, si tregtia e drogës dhe rrjetet e pedofilisë, të zhvillohen pa pengesa në aplikacionin e mesazheve.
Sipërmarrësi me origjinë ruse jeton në Dubai, ku janë dhe qendrat e Telegram, dhe ka shtetësi të dyfishtë të Francës dhe Emirateve të Bashkuara Arabe. Durov, i cili vlerësohet nga Forbes të ketë një pasuri prej $15.5 miliardë, u largua nga Rusia në vitin 2014 pasi refuzoi të përmbushte kërkesat për mbylljen e komuniteteve të opozitës në platformën e tij të mediave sociale VKontakte, të cilën më pas e shiti.
“Preferoj të jem i lirë në vend që të marr urdhra nga kushdo”, i tha Durov gazetarit amerikan Tucker Carlson në prill kur u pyet rreth largimit të tij nga Rusia dhe kërkimin e një shtëpie për kompaninë e tij, e cila përfshinte qytete si Berlini, Londra, Singapori dhe San Francisko.
Durov dhe vëllai i tij Nikolai themeluan aplikacionin e mesazheve në vitin 2013 dhe tashmë kjo platformë ka rreth 900 milionë përdorues aktivë. Telegram ofron komunikim të enkriptuar dhe përdoruesit gjithashtu mund të krijojnë “Channels” për të shpërndarë informacionin shpejt te ndjekësit.
