Një legjislacion i ri që është ende një draft është publikuar nga liderët e Bashkimit Evropian, dhe në të tregohet se do të bëhet e ligjshme që agjencitë kombëtare të sigurisë të spiunojnë gazetarët.
Të mërkurën, Këshilli Evropian publikoi një draft të Aktit Evropian për Lirinë e Medias që do të lejonte vendosjen software-ve të spiunazhit në telefonat e gazetarëve nëse një qeveri kombëtare e mendonte të nevojshme. Në mënyrë të pazakontë, këshilli nuk ndërmori hapin e mbajtjes së një takimi personal të ministrave përgjegjës me median përpara se të publikohej drafti.
Eurodeputetja holandeze Sophie in’t Veld, e cila ka mbikëqyrur hetimin e Parlamentit Evropian për përdorimin e spyëare Pegasus ndaj gazetarëve dhe figurave publike, tha se pretendimet që thonin se leja për të spiunuar shtypin ishte e nevojshme në interes të sigurisë kombëtare ishte “një gënjeshtër. “
“Mendoj se ajo që po bën Këshilli është e papranueshme. Është gjithashtu e pakuptueshme. Epo, është e pakuptueshme nëse ata janë seriozë për demokracinë, “tha In’t Veld.
Drafti i parë i aktit – i paraqitur fillimisht nga Komisioni Evropian për të forcuar pavarësinë e gazetarisë në vendet ku ajo është nën kërcënim si Polonia dhe Hungaria – kishte përfshirë masa mbrojtëse të forta kundër përdorimit të spyëare. Drafti duhet të miratohet nga Parlamenti Evropian përpara se të bëhet ligj.
Federata Evropiane e Gazetarëve (EFJ), e cila përfaqëson më shumë se 300,000 anëtarë të shtypit në 45 shtete, akuzoi liderët e BE-së se po mospërfillin parimet e lirisë së medias. EFJ tha se masa ishte një “goditje për lirinë e medias” që do t’i “vendoste gazetarët edhe më në rrezik” sesa janë tashmë.
“Ne e dimë shumë mirë se si mbrojtja e sigurisë kombëtare keqpërdoret për të justifikuar shkeljet e lirisë së medias,” shtoi kjo organizatë në një deklaratë duke i bërë thirrje Parlamentit Evropian që të “shpëtojë” projektligjin nga ky kërcënim.
