Ndërkohë që BE firmosi projektligjin historik që do të detyrojë shitjen e makinave me zero emëtime CO2 duke filluar nga viti 2035, shtetet evropiane po nxitojnë që të përgatisin infrastrukturën e nevojshme për këtë ndryshim rrënjësor.
Suedia është një ndër shtetet që e ka marrë mjaft seriozisht këtë ndryshim, dhe po përgatitet për të ndërtuar për herë të parë rrugën permanente që do të karikojë makinat elektrike ndërkohë që ato lëvizin. Ekspertët tregojnë se karikimi dinamik do të bëjë të mundur që makinat elektrike të udhëtojnë në distanca më të gjata ndërkohë që përdorin bateri të vogla, për të shmangur kështu pritjen e rradhës në stacionet e karikimit.
“Ne mendojmë se elektrifikimi është zgjidhja e duhur drejt dekarbonizimit të sektorit të transportit dhe ne po punojmë për të gjetur disa metoda të ndryshme.” tha Jan Pettersson, drejtues i Zhvillimit Strategjik në administratën e transportit në Suedi.
Projekti planifikohet që të nisë të zbatohet duke nisur nga viti 2025. Metoda e karikimit nuk është përcaktuar ende, megjithatë ekzistojnë 3 lloje karikimi: induktiv, konduktiv dhe me kabllo.
Karikimi nëpërmjet kabllove mund të përdoret vetëm nga mjetet e rënda, të cilat përdorin kabllot mbi këto mjete të rënda për të ofruar elektricitet.
Karikimi konduktiv funksionon si një stacion karikimi për smartphone-t, ndërkohë që sistemi i karikimit induktiv shfrytëzon pajisjet e integruara nën rrugë për të dërguar elektricitet drejt makinës elektrike.
