Rolls Royce ka nisur zyrtarisht tranzicionin drejt makinave elektrike. Prodhuesi britanik i makinave luksoze ka prezantuar makinën e parë elektrike të quajtur Spectre Coupe.
“Pasardhësi shpirtëror” i Phantom ka një pamje të ngjashme me modelin e fuqizuar nga motori me djegie të brendshme, mirëpo premton se do të jetë më pak i zhurmshëm se ky model. Kompania ende nuk i ka zbuluar të gjitha specifikat e makinës elektrike, mirëpo është bërë e ditur se shpejtësia nga 0-100km/h do të arrihet në vetëm 4.4 sekonda dhe do të ketë një autonomi prej 420km. Spectre përdor një platformë të re alumini të dizenjuar për EV.
Këto nuk janë shifra të jashtëzakonshme, mirëpo nuk duhet të harrojmë se një Rolls Royce blihet për rehatinë që ofron dhe jo performancën më të mirë.
Kjo gjë mund të vihet re dhe në interiorin e makinës. Aty përfshihet sistemi infotainment që është shndërruar në një domosdoshmëri në ditët e sotme, e shoqëruar nga një tjetër ekran në pjesën e pasagjerit. Asistenti dixhital “Eleanor”do të ndihmojë përdoruesit dhe të përmbushë kërkesat e tyre.
Të gjithë personat që dëshirojnë mund ta porosisin një makinë të tillë për çmimin $413,500 në SHBA (pa kryer asnjë personalizim).
