Një 23-vjeçar nga Nju Jorku ka bërë bujë në internet pasi organizoi atë që ai e quajti “DDoS-i i parë në botë ndaj Waymo-s”, duke vënë në shënjestër kompaninë e makinave autonome të Google. Riley Walz, publikoi disa fotografi në llogarinë e tij në X ku ai dhe rreth 50 persona të tjerë porosisnin njëkohësisht makina Waymo në një rrugë të gjatë e të mbyllur në San Francisko — një “sulm” virtual i kthyer në veprim real.
Në botën dixhitale, një sulm DDoS (Distributed Denial of Service) ndodh kur një rrjet i tërë kërkesash e bllokon një shërbim online. Walz e solli këtë koncept në realitet, duke mbingarkuar sistemin e rezervimeve të Waymo. Kur makinat pa shofer mbërritën, askush nuk hipi në to. Pas 10 minutash, ato u larguan, duke aplikuar një tarifë prej 5 dollarësh për “mosparaqitje”.
The plan? At dusk, 50 people went to San Francisco's longest dead-end street and all ordered a Waymo at the same time.
— Riley Walz (@rtwlz) October 12, 2025
The world's first: WAYMO DDOS pic.twitter.com/DEDH0tdMKP
Waymo reagoi duke pezulluar përkohësisht të gjitha udhëtimet në një rreze prej dy blloqesh, për të shmangur përsëritjen e situatës. Walz theksoi se gjithçka ishte një shaka “e padëmshme” dhe e krahasoi me trafikun pas përfundimit të një koncerti.
Megjithatë, jo të gjitha ndërhyrjet ndaj Waymo-s kanë qenë me tone humoristike. Në vitin 2023, grupi aktivist Safe Street Rebel protestoi kundër pranisë së makinave autonome në San Francisko duke vendosur konë trafiku mbi këto makina, duke i bërë të ndalonin plotësisht. Aktivistët e akuzuan kompaninë për “përforcim të dominimit të makinave në qytet”.
Në raste të tjera, protestuesit kanë përdorur makinat Waymo si barriera gjatë përplasjeve me policinë. Pavarësisht polemikave, një gjë mbetet e qartë: makinat autonome po bëhen gjithnjë e më shumë pjesë e realitetit urban — dhe shpesh, të debatit publik.
