Drejtuesi Financiar i Ford, John Lawler, zbuloi se Ford nuk ka më asnjë përfitim nga shitja e makinës elektrike Mustang Mach-e për shkak të nivelit të rritur të inflacionit. Ky lajm surprizues u zbulua gjatë një konference në ditën e mërkurë në Deutsche Bank, ku cilësoi si arsyen kryesore se përse kompania nuk po nxjerr përfitime rritjen e kostos së materialeve të baterisë.
Kur Mach-e u lançua në vitin 2020, prodhuesi kishte përfitime me shitjen e çdo njësie. Ford bëri një rritje çmimi të Mach-e gjatë vitit të kaluar për të ndihmuar rritjen e kostove të baterisë, mirëpo kjo rritje tashmë është zhvlerësuar tërësisht, sipas Lawler.
Dhe pse çmimet janë rritur, Lawler tregon se Ford nuk po shikon një ulje të kërkesës për makinën elektrike, dhe pse divizioni i shërbimeve financiare tregon se ppo shikojnë një rritje të shkeljeve, ku klientët nuk po kryejnë pagesat, ose po i kryejnë me shumë vonesë.
Ford raportoi se ka shitur më shumë Mach-e se më parë, pothuajse 5,200 njësi brenda një muaji, një rritje prej 166% krahasuar me muajin maj të 2021.
Është e rëndësishme të theksojmë se gjatë kësaj jave Ford lajmëroi se Mach-e vuan nga një problem potencial ku mund të humbë fuqinë. Për këtë arsye është e nevojshme tërheqja e rreth 50,000 makinave nga tregu për t’u rregulluar.
