CEO i Tesla, Elon Musk, i ka kërkuar punonjësve përmes një email-i të rikthehen në zyra, dhe nëse ato nuk dëshirojnë të rikthehen do të trajtohen si të larguar nga puna.
“Të gjithë në Tesla e kanë të detyrueshme të shpenzojnë të paktën 40 orë në javë në zyrë. Nëse ju nuk riktheheni në zyrë, ne do të supozojmë se ju keni dhënë dorëheqjen. Prezenca e personave me më shumë vite punë në Tesla duhet të jetë e madhe. Kjo është arsyeja se përse unë jetoj në fabrikë kaq shumë – në mënyrë që punonjësit të më shikojnë duke punuar pranë tyre. Nëse unë nuk do ta bëja një gjë të tillë, Tesla do të falimentonte shumë kohë më parë.”
Kompanitë e mëdha teknologjike në Silicon Valley nuk kanë kërkuar që punonjësit të rikthehen në kohë të plotë në zyra, për shkak se ato po përballen me rezistencën e punonjësve dhe rritjen e numrit të personave të infektuar me COVID-19.
“Ka patur shumë kompani që nuk e kanë kërkuar rikthimin në zyra, por kur është hera e fundit që ata kanë prezantuar një produkt të mirë?” shtoi Elon Musk në email. “Tesla do të krijojë produktet më të emocionuese dhe më me kuptim nga të gjitha kompanitë e tjera. Kjo nuk mund të ndodhë duke punuar në largësi.”
