Me avancimin e teknologjisë, ka nisur të ngushtohet shumë vija ndarëse midis industrisë së prodhimit të makinave dhe asaj të prodhimit të smartphone-ve. Disa prodhues të makinave si NIO dhe Geely kanë nisur tashmë të futen në tregun e krijimit të smartphone-ve, ndërkohë që prodhuesit e smartphone-ve si Xiaomi pritet të futet në tregun e makinave elektrike.
Në internet kanë nisur të qarkullojnë imazhet e para të makinës elektrike Xiaomi MS11, e cila pritet të lançohet në tregun kinez në vitin 2024. Këto imazhe duket të jenë shkrepur nëpërmjet një smartphone-i nga ekranet e kompjuterave në zyrat e Xiaomi, dhe duken aq të detajuara si të jenë foto të vërteta të kësaj makine.
Qëllimi kryesor i Xiaomi në momentin e themelimit të kompanisë në vitin 2010 ishte prodhimi i smartphone-ve, mirëpo me kalimin e kohës kompania u zgjerua shumë duke prodhuar televizorë dhe pajisje elektroshtëpiake të ndryshme, kështu që është mjaft e besueshme që hapi i radhës për kompaninë është integrimi në industrinë e prodhimit të makinave.
Nga fotografitë mund të shikojmë formën sportive të kësaj makine, me tavanin tërësisht të tejdukshëm ku janë instaluar dy kamera LiDAR si dhe dorezat e dyerve që futen brenda në makinë kur ajo është në lëvizje.
Modeli MS11 do të përdorë bateritë nga CATL dhe BYD, ndërkohë që motori elektrik do të zhvillohet nga vetë kompania. MS11 besohet se është emri i koduar i këtij automjeti, ndërkohë që emri i vërtetë do të jetë Modena.
