Si një nga platformat më të mëdha dhe më të përdorura të komunikimit në botë, WhatsApp ka avantazhet dhe disavantazhet e saja. Dhe pse vetë aplikacioni është shumë i qëndrueshëm dhe shumë i thjeshtë për t’u përdorur, në të janë shtuar shumë telefonatat nga kompanitë e marketingut apo nga persona të tjerë që dëshirojnë t’ju mashtrojnë.
Prandaj zhvilluesit në WhatsApp kanë menduar që të ofrojnë një shërbim të ri në platformë, që do të bëjë të mundur ndalimin e thirrjeve nga numrat e panjohur. Për herë të parë ky shërbim u vu re nga WABetaInfo në versionin më të ri beta 2.23.10.7. Për të aktivizuar këtë shërbim, ju mund të shkoni në Settings > Privacy > Silence unknown callers.
Në mënyrë të ngjashme me shumë shërbime të tjera që gjenden vetëm në versionet beta, mundet që ky shërbim mos të ketë ardhur pranë të gjithë përdoruesve, por besohet që me kalimin e kohës do të shpërndahet drejt akoma dhe më tepër përdoruesve.
Kur ju të aktivizoni këtë shërbim, është e vërtetë që nuk do të njoftoheni sa herë që ju telefonojnë nga një numër i panjohur, megjithatë numri që ju ka kontaktuar do të shfaqet sërisht në tabelën Calls. Në këtë mënyrë përdoruesit do të mund të kuptojnë nëse ky numër është i një personi të njohur apo jo.
