Disa përdorues të versionit beta të WhatsApp kanë nisur të raportojnë praninë e një shërbimi të ri i cili i lejon ata të dërgojnë fotografi me kualitet HD. Është e vërtetë që ky shërbim nuk lejon shpërndarjen e fotografive në cilësinë origjinale, megjithatë rezolucioni i tyre është shumë më i lartë se momentalisht.
Ishte WABetaInfo që e zbuloi për herë të parë shërbimin e ri në versionet beta si për iOS (23.11.0.76) dhe për Android (2.23.12.13). Duket se ky shërbim është ende në fazat e para të testimit, pasi nuk iu është shfaqur të gjithë përdoruesve të versionit beta të WhatsApp.
Me sa mund të shikojmë nga fotografitë e bëra leak, mund të kuptojmë se kur ju përgatiteni për të shpërndarë një fotografi, në pjesën e sipërme të shërbimeve do të gjeni një ikonë të re që ju jep mundësinë ta shpërndani fotografinë në cilësi të lartë. Ky opsion nuk do të jetë i pranishëm në të gjitha fotografitë, por në ato që kanë një madhësi të konsiderueshme.
Megjithatë duhet t’ju kujtojmë se këto foto nuk mund të dërgohen në kualitetin origjinal, pasi platforma do t’i kompresojë sërisht. Për të dërguar fotografi në rezolucionin origjinal ju duhet t’i dërgoni fotografitë si një dokument.
