TikTok tregoi vitin e kaluar se kishte rreth 1 miliardë përdorues aktivë në mbarë botën, gjë që vërteton suksesin e algoritmit të platformës. Kjo gjë nuk e ka ndaluar kompaninë të testojë dhe prezantojë shërbime të reja, duke përfshirë këtu dhe disa shërbime që e shndërrojnë TikTok në një konkurrent të denjë për YouTube.
Kompania ka konfirmuar se disa përdorues të caktuar do të kenë mundësinë të testojnë një modalitet full-screen horizontal për videot e publikuara në rrjetin social. Përdoruesit do të shikojnë një buton të ri në videot katrore apo drejtkëndore në feed-in e tyre. Nëse ato shtypin këtë buton, video do të zgjerohet horizontalisht dhe do të mbulojë ekranin plotësisht.
Shumica e videove në TikTok njihen për kohëzgjatjen e tyre të shkurtër dhe orientimin vertikal, dhe aktualisht krijuesit duhet të vendosin një mesazh për të rrotulluar ekranin në fillim të videos nëse publikojnë një video në orientimin horizontal.
Nëpërmjet shërbimit të ri ky mesazh nuk do të jetë më i nevojshëm, dhe në platformë mund të rritet numri i videove me orientim horizontal, sigurisht nëse shërbimi kalon fazën e testimit.
Në këtë mënyrë TikTok dëshiron të afrojë pranë platformës së saj të gjithë fansat që pëlqejnë formatin e videove në YouTube. Rrjeti social ka lejuar gjatë kohëve të fundit publikimin e videove deri në 10 minuta të gjata.
