Gjatë sesionit të tij të përjavshëm Ask Me Anything në Instagram, drejtuesi Adam Mosseri tregoi se algoritmi i platformës është ribalancuar tashmë në rekomandimin e Reels dhe fotografive të ndryshme përgjatë muajit të fundit.
Kjo përgjigje erdhi pasi një ndjekës anonim kishte pyetur Mosseri-n se përse Instagram nuk mbështeste rritjen e profileve që publikojnë vetëm fotografi, duke favorizuar rritjen e profileve që publikojnë Reels.
Mosseri e pranoi se më herët gjatë këtij viti platforma kishte favorizuar Reels nëpërmjet algoritmit rekomandues, por tashmë ai tregoi se ka një ribalancim në platformë. Ai tha se fotografitë dhe Reels janë më të barabarta në algoritmin e Instagram, dhe do të kenë një shpërndarje të njejtë.
“Ne nuk po kërkojmë që të frenojmë rritjen e profileve që publikojnë vetëm fotot,” tha Mosseri. “Unë mendoj se u fokusuam pak më tepër tek videot këtë verë dhe që nga ajo kohë mendoj se i kemi ribalancuar gjërat, prandaj besoj se nga të dhënat që shikoj dhe shumë komunikime me krijues të ndryshëm, gjërat janë stabilizuar gjatë muajit të fundit.”
Për të gjithë fotografët që nuk po shikojnë një rritje të tillë me adresën e tyre, Mosseri i këshilloi të kontaktojnë me ekipin e Instagram.
