Përdorimi i WhatsApp në disa pajisje të ndryshme ishte praktikisht i pamundur disa vite më parë, por aplikacioni i komunikimit e bëri më të mundur këtë gjë duke prezantuar funksionalitetin linked devices.
Ju mund të përdorni një pajisje primare që merr të gjitha mesazhet dhe më pas adresën tuaj mund ta aksesoni dhe në pajisje dytësore të tjera në sistemet operative Android, iOS, Web, Windows dhe macOS me mesazhet e sinkronizuara gjatë gjithë kohës. Për të përmirësuar akoma më tepër këtë eksperiencë, WhatsApp po punon për të ofruar një shërbim të ri të kyçjes së bisedave i cili do të jetë i pranishëm dhe i sinkronizuar në të gjitha këto pajisje.
Përdoruesit e Android dhe iOS mund të kyçin bisedat me një fjalëkalim, Face ID apo gjurmës së gishtit. Sidoqoftë, këto biseda aktualisht janë të kyçura vetëm në smartphone-in tuaj, pasi në web, Windows dhe macOS bisedat nuk janë të kyçura.
Sipas një raporti nga WABetaInfo, kompania është duke punuar për një shërbim të ri sinkronizimi që do të kyçë bisedat në të gjitha pajisjet ku ju e përdorni WhatsApp. Në këtë mënyrë, kur ju kyçni një bisedë në një pajisje, ajo do të kyçet automatikisht edhe në pajisjet tuaja të tjera të lidhura. Shërbimi është aktualisht në zhvillim, kështu që do t’ju duhet të prisni dhe pak kohë deri sa ai të vijë drejt të gjithë përdoruesve.
Krahas kësaj, WABetaInfo gjithashtu raporton se WhatsApp po vazhdon punën e saj për implementimin e usernames. Ky shërbim do ta bënte më të lehtë bisedimin me njerëz të tjerë pa i dhënë atyre numrin tuaj të telefonit.
