Ndër shërbimet më të dobishme të Google është edhe Street View. Një aplikacion që përveç hartës dhe orientimit na ka mundësuar të kemi pamje 3D të pothuajse çdo cepi të globit, duke na e bërë botën më të vogël. Dhe nuk ishte aspak detyrë e thjeshtë, pasi për të fotografuar për Street View kërkohet një lloj i veçantë kamere 360 gradë, një automjet ose biçikletë e kështu me radhë, goxha shpenzime.
Por duket se gjërat janë thjeshtësuar më shumë, ndërsa Google lajmëron se kushdo do të mund të ngarkojë foto të rrugëve në Street View, kushdo që ka një Android me suport për ARCore. Duke përdorur këtë shërbim të smartphonit do të jetë e mundur të regjistrohen një sërë fotosh të lidhura, ato do të ngarkohen direkt në aplikacion dhe serverat e Google do t’i bashkojnë për të përditësuar sa më shumë rrugët që figurojnë në hartat e tyre.
Kjo padyshim i sjell benefite vetë kompanisë pasi tani do të ketë miliona njerëz që kontribuojnë në shërbimet e saj por edhe për ne përdoruesit që do të shohim gjëra shumë herë më të përditësuara. E së fundmi mos harrojmë gallatën e madhe që Street View na ka dhuruar këto vite me skena nga më të çuditshmet, tani vetëm imagjinojeni ç’mund të ndodhë kur ke miliona reporterë në terren.
Programi do të fillojë së shpejti testimet në U.S.A, pjesa tjetër e globit pritet të bashkohet më vonë.
